Чи халкьдихъ «Михьивал сагъламвилин замин я» лугьудай хъсан мисал ава. Идалайни гъейри, михьи чкада къекъуьн, ял ягъун, гьатта михьи чка акунни рикIиз хуш къведай кар я.
«Сулейман-Стальский район» муниципальный райондин Кьил Нариман Шамсудинович Абдулмуталибова, администрацияди, талукь къуллугърин руководителри райондин хуьрера, рекьерин къерехра, паркара михьивилер хуьниз кьилин фикир гун дуьшуьшдин кар туш. И рекьяй райондин руководстводи мукьвара баркаллу мад са кIвалахдик кьил кутуна: ноябрдин варз районда аваданламишунин, михьивилер авунин, вири хуьрера къелемар ва кул-кусар цунин, административный дараматрин, объектрин патарив гвай чкаярни рекьерин къерехар къайдадиз гъунин варз яз малумарна, тухудай кIвалахар тайинарна, гьар са поселенидихъ, территориядихъ администрациядин Кьилин заместителар, управленийринни отделрин начальникар, хуьрерин поселенийрин кьилер галкIурна.
7 ва 14-ноябрдин йикъара (киш) райондин центрадал ва хуьрера, гьакIни карханайрани организацийра субботникар кьиле фена. Администрациядин архитектурадин, эцигунрин ва ЖКХ-дин отделдин начальник Мустафа Мустафаева чаз лагьайвал, администрациядин, информациядин агентстводин, эцигунринни ЖКХ-дин отделдин, «Касумкентсервис» ООО-дин пешекарри Кьасумхуьрел зирзибил гадарун патал эцигзавай полигондин территорияда къелемар ва кул-кусар цунин кIвалахар кьиле тухвана. Ихьтин кIвалахар райцентрадал алай пуд мертебадин административный дараматдин территорияда тухунин карда «Альянс» ООО-дин, «УМИЗ» МБУ-дин, образованидин управленидин работникри иштиракна.
Райондин культурадин отделдин пешекарри Культурадин Дворецдин территорияда санитариядин рекьяй михьивилер авуна.
Субботникда райцентрадал алай маса идарайрин, карханайрин, школайрин коллективрини иштиракна. И рекьяй ЦIийи поселокдин юкьван школа иллаки къейд авуниз лайихлу я. Кьиле школадин директор Бег Ягъибегов аваз субботникдиз вири муаллимар ва чIехи классрин аялар экъечIна. Абуру школадин территорияда, Ватандин ЧIехи дяведа телеф хьайибуруз ЦIийи поселокдин кIанихъ эцигнавай обелискдин патарив, шегьре рекьин къерехра михьивилер авуна, са шумуд чкадилай газдин турбаяр цагъамрикайни чмуррин валарикай михьна, анрал абур гъана.
Герейханован хуьруьн 2-нумрадин юкьван школадин муаллимри ва аялри (директор Малаудин Сафаралиев) чпин территорияда, хуьруьн юкьвал алай майдандал, шегьре рекьин къерехра михьивилер авунин рекьяй тухвай кIвалахни къейд авуниз лайихлу я.
Са рахунни алачиз, субботникар тухуни вичин хъсан нетижа гузва: хуьрер авадан, михьи жезва. Гьич тахьайтIа, субботникар тухудайла общественный дараматрин патарив, рекьерин къерехра 1500-дав агакьна къелемар цана, и кар давамни хъийизва.
- Районда 21 ва 28-ноябрдин йикъара кьве субботник тухун хъийида, - лугьузва Мустафа Мустафаева. – Умудзава хьи, анра хуьрерин агьалийри, идарайринни организайрин пешекарри мадни активвилелди иштиракда.
