Мукьвара Кьасумхуьрел кардик квай «Куьредин ярар» медениятдин центрадин типографияда Лезги писателрин Союздин ва РФ-дин журналистрин Союздин член, «Куьредин хабарар» газетдин редактордин заместитель Абидин Камилован нубатдин ктаб чапдай акъатна. Адаз ажийиб тIварни ганва - «Уьмуьрдин дад». Эхь, чаз ктабдай шаир фейи ва ада давамзавай уьмуьрдин рехъ, гьа рекьин «дад» аквазва. Гьакъикъатдани, уьмуьр вакъиайрив ацIанва.
Ктабда гьатнавай «Бахтунин накъвар», «Сочинение» новеллайрай, «Тамун верч», «Кьил туькIуьрун», «Рэкетирвилин налог» юморескайрай, «Сифтегьан гъуьрч» гьикаядай, «Ичкидин есирда гьатайла» интермедиядай, «Къизилдин кака», «А машмашра цилерни авайди тирни» къаравилийрай ва прозадин маса эсеррай чаз инсанрин кьилел атай ажайиб агьвалатар, абурун къилихар аквазва. Абуруз айгьам, хъуьруьн-зарафат хас я.
Вичихъ прозадин гзаф эсерар, кьилдин ктаб аватIани, Абидин Камилован яратмишунра шииррин эсерри кьилин чка кьазва. Ктабда гьатнавай «Зи район», «Дербент шегьер-Кьвевар шегьер», «Мешреб гъанва шегьердал ви къаматди» (Дербентда СтIал Сулейманаз гуьмбет ачухайла кхьей чIал), «Бахт ва вахт», «Руьгьдин гьарай» ва маса шииррай А. Камилован рикIин гьиссер, гекъигунрин деринвал, чIалан везинвал аквазва.
Са гафуналди, метлебдин, хиялрин жигьетдай деринвал ктабда гьатнавай вири эсерриз хас я.
«Уьмуьрдин дад» ктабда эхиримжи вахтара Абидин Камилован гъиликай хкатнавай 40-далай виниз эсерар гьатнава, ам 72 чиникай ибарат я, тиражни 100 экземпляр я.
Са рахунни алач, вилик акъатай ктабар хьиз, А. Камилован цIийи ктабни кIелзавайбуру хушвилелди кьабулда.
Хазран Кьасумов, Лезги писателрин Союздин член.
