Мукьвара Катардин Доха шегьерда боксдай дуьньядин чемпионат кьиле фена. Ана чи районэгьли, алай вахтунда Азербайжандин хкянавай командадик кваз вичин къуватар ахтармишзавай Альберт СЕЛИМОВАНИ иштиракна.
Катарда кьиле фейи акъажунра А.Селимова 4 бягьс кьиле тухвана. Чи районэгьлиди Ирландиядай тир Шон Маккомбан, Франциядай тир Стефан Оумиян, Бразилиядай тир Робсон Донатодин винел инанмишвилелди гъалибвал къазанмишна. Финалдин акъажунра чи боксёрди вичин къуватар Кубадай тир Ласаро Альваресахъ галаз ахтармишна, бягьс тамам тушир кьве раундда давам хьана. Каспийскдин боксдин школада Россиядин лайихлу тре¬нер Нурипаша Талибован гъилик вердишвилер къачур Альберт Селимова дуьньядин чемпионатда ги¬мишдин медаль къазанмишна.
Къейд авун лазим я хьи, Аль¬берт Селимова сад лагьай раундда гъалибвал къазанмишна: пуд судьядини ихьтин къарар акъуднавай.
Кьвед лагьай раундда А.Селимован пеляй кьацI акъатун себеб яз бягьс акъвазарна, чи районэгьлидин духтурди акъажунар давамар тавунин къарар кьабулна. ИкI, тех¬нический нокаутдалди Л. Альварес гъалиб хьана. Гьайиф чIугуналди, эхирдай комментаторди Альберт Селимов очкойрай вилик квайди къейднай.
А.Селимов 1986-йисан 5-апрелдиз дидедиз хьана. Ам 4 сефер¬да Россиядин чемпион я. 2007-йисуз Россиядин хкянавай командадик кваз иштиракай Альберт Сели¬мова США-дин Чикаго шегьерда кьиле фейи дуьньядин чемпионат¬да къизилдин медаль - дуьньядин чемпионвилин – тIвар, 2009-йисуз лагьайтIа, Италиядин Римда кьи¬ле фейи дуьньядин чемпионатда буьруьнждин медаль къазанмишнай. Альберт Селимов Европадин кьве сеферда чемпионвилин (2006 ва 2010-йй.) тIварарин, цIинин йисуз Бакуда кьиле фейи Европадин сад лагьай къугъунрин къизилдин медалдин сагьибни я.
Чи мурад А.Селимовахъ Олимпиададин къугъунра чемпионви¬лин тIвар къазанмишдай къуватар хьун я.
Асият Мусаева, РФ-дин журналистрин Союздин член.