Малум тирвал, чIехи алим-тарихчи, зурба бажарагъ авай шаир ва арифдар Алкьвадар Гьасан-эфенди дидедиз хьайи октябрдин варз чи районда адан уьмуьрдиз ва яратмишунриз талукьарнавай варз яз махсус пландин бинедаллаз кьиле тухузва. Идахъ галаз сад хьиз, и йикъара кIелдайбурал багьа савкьват яз агакьнавай алимдин виридалайни чIехи илимдин кIвалах тир лезги чIалалди чапдай акъатнавай «Асари Дагъустан» ктабдин презентацияни кьиле физва, чIехи алимдин уьмуьрдин рекьиз ва яратмишунриз талукьарна школайра сочиненияр кхьизва, культурадин маканра тематикадин мярекатар кьиле тухузва.
И йикъара чIехи арифдар Алкьвадар Гьасан-эфендидин тIвару-нихъ галай райондин центральный библиотекадин кIелдайбурун залда адан уьмуьрдиз ва яратмишунриз талукьарнавай шадвилин мярекат кьиле фена.
Аниз ЦБС-дин работникрилай алава яз жегьил кIелдайбуруз - хуьрерин школайрин аялриз, муаллимриз, райондин яратмишдай интеллигенциядин векилриз теклифнавай.
Залда аквадай чкадал алимдин ктабрин выставка ачухнавай.
Мярекат, чIехи алимдикай, марифатчидикай, шаирдикай куьруь гаф рахуналди, атанвай мугьманар тебрик авуналди ЦБС-дин абонентрин отделдин заведующий, арифдардин невейрикай тир Наиля Шихбабаевади ачухна.
Анал алимдин уьмуьрдикай ва яратмишунрикай куьруь гаф гваз ЦБС-дин къуллугъчи М. Абасова рахана.
Гуьгъуьнлай анал алимдин, шаирдин ва арифдардин гьакъиндай чпин фикирар гваз Гьасан эфендидин музейдин директор, адан невейрикай тир шаир ва писатель Гьуьсейн Гьуьсейнов, шаир Сажидин Саидгьасанов, писатель, муаллим Нажмудин Шихнабиев, Вини СтIалрин юкьван школадин дидед чIалан муаллим ва шаир Минаят Муталибова, и цIарарин автор, активный кIелдайди ва чи шаиррин, алимрин ирс кIватIунал машгъул кас тир Назим Ражабов, «Куьредин ярар» культурадин макандин регьбер Агьмедпаша Агьмедпашаев рахана.
Абурун рахунрин арайра Кьасумхуьруьн, Алкьвадрин, Алидхуьруьн, Кьулан СтIалрин школайрин аялри Гьасан-эфендидин шиирар хуралай кIелна.
Санлай кьурла и мярекат маракьлуди ва менфятлуди хьана.
А. Камилов.
Шикилда: мярекат кьиле физвай вахт.
