Бубайрин мисалда лугьузвайвал, кьуьд кIеви имтигьан я, адаз вахтундамаз ва вири патарихъай гьазур хьунни лазим я. «Сулейман-Стальский район» муниципальный райондин администрациядин архитектурадин, эцигунрин ва ЖКХ-дин отделдин начальник М. А. Мустафаевахъ галаз гуьруьшмиш хьайила, чи арада район хъуьтIуьз гьазур хьанвай гьалдикай ихтилатни кьиле фена.
- Мустафа Абузарович, вавай район, яшайишдинни коммунальный майишатрин объектар хъуьтIуьн сезондиз гьазур хьанвай гьалдин гьакъиндай вуч лугьуз жеда?
- Сифтедай лугьуз кIанзава хьи, 2015-йисан 14-майдиз 224-нумрадик кваз райондин администрацияди «2014-2015-йисарин зулунни хъуьтIуьн девирда яшайишдинни коммунальный майишатри авур кIвалахдин гьакъиндай ва 2015-2016-йисарин зулунни хъуьтIуьн девирда кIвалах авунин везифайрикай» къарар кьабулнава ва ам уьмуьрдиз кечирмишун патал кIвалахни тухузва. Кьилди къачуртIа, зулунни хъуьтIуьн девирда ЖКХ-рин объектри тухудай кIвалахрин план туькIуьрна, ам кьилиз акъудунал гуьзчивал тухудай комиссия тестикьарна. Чими ийидай системаяр ремонт авуниз, капитальный ва куьлуь маса ремонтрин кIвалахриз райондин администрацияди 5448 агъзур манат пул ахъайна. Алай йисуз 200 кубический метр кIарасар ва 30 тонн къванцин цIивин гьазурун планламишнава.
Кьасумхуьруьн мехлесхоздихъ галаз икьрар хьуналди газ тухун тавунвай хуьрерин организацияр ва карханаяр патал бес кьадар кудай кIарасар гьазурнава. Къванцин цIивин хкун патал «Дагестантоппром» ООО-дин Белиждин ГТС-дин филиалдихъ галаз икьрар кутIуннава.
Пулунин такьатрин патахъай авай четинвилеризни килиг тавуна, яшайишдинни коммунальный майишатрин объектрал ремонтринни эцигунрин кIвалахар вахтунда тухвана акьалтIарнава.
- Малум тирвал, райондин школайрин чIехи пай куьгьне, кутуг тавур дараматра ава. Школаяр хъуьтIуьз гьазур яни?
- Районда газдалди таъмин тир образованидин 51 идара кардик ква, Хпуькьрин, Ичинрин, Качалхуьруьн, КIахцугърин, Агъа Хъартасрин, Вини Хъартасрин, Птидхуьруьн, Пиперхуьруьн ва Татарханрин школайра къванцин цIивин ва кIарасар ишлемишзава.
ХъуьтIуьз гьазурвилер акун яз Кьасумхуьруьн 1-нумрадин СОШ-да учебный корпусдин къав дегишарна, электротрансформатор хатасуз чкадал эцигна, Кьулан СтIалрин, Чуьхверхуьруьн, ЦIийи поселокдин ва Герейхановский 1-нумрадин СОШ-ра чIехи пай дакIарар, НуьцIуьгърин СОШ-да цин насос, Вини СтIалрин, ЦIийи поселокдин, ЦIийи Макьарин СОШ-ра газдин счетчикар дегишарна, Алкьвадрин СОШ патал чими ийидай цIийи пич къачуна, Сардархуьруьн СОШ-да полар, потолокар михьиз дегишарна.
- Мустафа Абузарович, хъуьтIуьз гьазурвал акунин патахъай хуьрерин поселенийра вуч кIвалахар тухванва?
- Хуьрерин агьалияр, образованидин, культурадин ва социальный объектар хъуьтIуьн вахтунда газдалди, электричестводалди таъминарунихъ еке метлеб ава. И кар фикирда кьуна Эминхуьруьн, Герейхановский, Кьулан СтIалрин хуьрерин поселенийра 100-далай виниз экверин ракьунни бетондин столбаяр акIурна, хуьрера цIийиз арадал атанвай куьчейра 3000 погонный метрдин электропередачайрин линияр тухвана. Мадни, Курхуьруьн, Кьулан СтIалрин, Герейхановский, ЦIийи Макьарин, Хпуькьрин хуьрерин поселенийра 8 километр цин турбаяр дегишарна, 7200 погонный метрдин куьчейра херхем вегьена.
ХъуьтIуьз гьазурвилер акунин карда «Дагэнергосеть» ООО-дин Кьасумхуьруьн РЭС-ди ва райондин ЭГС-ди (эксплуатиционная газовая служба) тайин кIвалах тухванва.
- ХъуьтIуьн вахтунда рекьер авай гьалдилай инсанрин саламатвал ва хатасузвал гзаф аслу я. Рекьер хъуьтIуьн сезондиз гьазур яни?
- Лап гьахълу суал я. Чи шартIара, иллаки кьуьд живер, къаяр авайди хьайила, рекьер гзаф вахтара муркIади кьазва. Рекьер тиквал, къекъуьнар квайбур тирдини чна рикIелай ракъурзавач. Гуьзгуь хьиз хьанвай рекьерай гьерекат авун гьам автотранспорт, гьам инсанар патал четин жеда. Гьавиляй рекьер живедикай, муркIадикай михьи авунихъ еке метлебни ава.
Рекьер хъуьтIуьн вахтуниз гьазурунин везифаяр «Сулейман-Стальское ДЭП-32» ОАО-дин хиве ава. Ада 10 тонн технический кьел, 150 кубический метрдин муркIадиз акси тир материал, рекьерин 5 техника, 3 тонн ГСМ гьазурнава.
Гьелбетда, хъуьтIуьз вахтунда ва вири патарихъай гьазур хьун - им важиблу ва вахтуни истемишзавай месэла я. Гьавиляй месэла муниципальный райондин Кьил Нариман Шамсудинович Абдулмуталибован кьетIен гуьзчивиликни ква. Октябрдин вацра администрацияда кьиле фейи нубатдин совещанидал район хъуьтIуьз гьазур хьанвай гьалдиз килигна. И месэладай анал за гегьенш информация авуна, тухванвай кIвалахдикай лагьана.
Райондин руководстводи хъуьтIуьз вири патарихъай гьазурвал акунин патахъай талукь къуллугъриз ва пешекарриз тапшуругъар ганва, абур кьилиз акъудун патал чкайрал кIвалахни тухузва.
И кардал гуьзчивал тухун патал хуьрерин поселенийрихъ райондин администрациядин жавабдар работникар галкIурнава.
Лагьана кIанда, хъувуна кIанзавай тIимил-шимил кIвалахар амазма, абурни куьруь са вахтунда кьилиз акъудна акьалтIарда.
Санлай къачурла, район хъуьтIуьн сезондиз гьазур хьанва.
- Мустафа Абузарович, чи суалриз тамам жавабар гунай чухсагъул.
- Куьнни сагърай.
Хазран Кьасумов, «Куьредин хабарар» газетдин экономикадин отделдин заведующий
