Малум тирвал, алатай 2014-йис чи уьлкведа Культурадин йис яз кьиле фена. И йисуз чна Дагъустандин баркаллу рухвайрикай сад тир машгьур алим-тарихчи, марифатчи, шаир, чIехи арифдар чи районэгьли Алкьвадар Гьасан эфендидин 180 йис тамам хьунин юбилей гегьеншдаказ къейднай.
Кьасумхуьрел, райондин руководство кьиле аваз, Махачкъаладай атанвай алимар, арифдардин мукьва-кьилияр, райондин муаллимар, яратмишдай интеллигенциядин векилар ва атанвай маса мугьманар сифте чIехи алимдин сурал, гуьгъуьнлай адан музейдиз фена, райцентрадал Культурадин Дворецда алимдин-арифдардин уьмуьрдиз ва яратмишунриз талукьарнавай илимдинни тежрибадин конференция кьиле тухвана.
Алимдин музейдин директор Гь. Гьуьсейнова чIехи алимдин уьмуьрдиз ва яратмишунриз талукьарна илимдин кIвалах яз кхьенвай «Гьасан Алкадари» ктаб, гьакIни «Асари-Дагъустан» урус чIалалди чапдай акъудна, «Куьредин ярар» культурадин центради «Алкьвадар Гьасанан 180 йис» кьил гана, гуьрчегдаказ туькIуьрнавай махсус бюллетень акъудна. «Куьредин хабарар» газетда адакай гегьенш материалар гана.
Алай Литературадин йис и жигьетдай мад са баркаллу кардалди лишанлуди хьана – эхирни машгьур алимдин виридайлайни чIехи эсер тир «Асари-Дагъустан» ктаб лезги чIалалди чапдай акъатна.
Рангунин яцIу жилдер алаз ООО «Мавел» издательстводи чапдай акъуднавай 240 чиникай ибарат тир и ктабдин редактор чи машгьур шаир Майрудин Бабаханов, таржумачи Гьамзет Гьамзатов, ктабда гьатнавай шиирар ва къейдер лезги чIалаз элкъуьрайди Ризван Ризванов, алаваярни таржума авурди Фахрудин Насрединов я.
ЧIехи алим ва арифдар хайи октябрдин вацра чал багьа савкьват яз агакьнавай 200 экземплярдин кьадарда аваз чи С.-Стальский муниципальный районди вичин такьатрин гьисабдай акъуднавай и ктабдиз гьар са лезгидин тавханада лайихлу чка жагъидайдал шак алач.
И ктабдин экземплярар асул гьисабдалди чи районда авай музейриз, школайриз, культурадин ва общественный тешкилатрин маканриз ганва.
Алай вахтунда чи районда октябрдин варз чIехи алимдин ва шаирдин яратмишунрин варз яз махсус пландин бинедаллаз кьиле тухузва.
Абидин Камилов, ЛПС-дин райондин отделенидин председатель.