Мукьвара Кстово шегьерда самбодай Россиядин Кубок патал акъажунар кьиле фена. Ана Кеферпатан Кавказдин федеральный округдин хкянавай командадик кваз ери-бине Кьасумхуьрелай тир, Махачкъалада къайдаяр хуьдай органра кIвалахзавай РФ-дин спортдин мастер, Универсальный женгерай Европадин чемпион Аслан Къурбановани иштиракна.
Акъажунар лап къизгъиндаказ кьиле фена. ГьикI лагьайтIа, Кстово шегьердиз Европадин, дуьньядин чемпионарни призерар, Россиядин лап къуватлу спортсменар атанвай. ИкI, А. Къурбанован заланвиляй (90 килограмм) акъажунриз 27 спортсмен экъечIна. Аслана дуьньядин чемпион, спортдин лайихлу мастер Алексей Харитован, спортдин международный классдин мастерар тир Виктор Осипенкодин, Михаил Полянскийдин, Павел Румянцеван винел инанмишвилелди гъалибвилер къазанмишна. Финалдиз экъечIун патал Аслан Къурбанов, судьяяр къаришмиш хьуникди, барабар женгина Москвадай тир спортдин мастер, Россиядин чемпион Дмитрий Пивкиназ кумукьна.
Россиядин Кубок патал акъажунра Аслан Къурбанов 3-чкадиз лайихлу хьана. Адаз 3-дережадин диплом, буьруьнждин медаль гана.
Са рахунни алачиз А. Къурбанова кьур 3-чка адан еке агалкьун яз гьисабиз жеда.
Мадни шадвал кутадай кар ам я хьи, Аслана вичин дах, пуд жуьредай спортдин мастер Юрий Къурбанован ва имияр тир пешекаррин арада дзюдодай ва самбодай дуьньядин чемпионар Рамазан ва Тельман Къурбановрин кар уьзуьагъдаказ давамарзава.
Хазран Кьасумов.
