РикIел хъсандиз алама, уьлкведа перестройкадин гьерекатар башламиш жедалди КIварчагъ дередин кьуд хуьруькай ибарат яз хьайи «Коммуна» сов¬хоз, уьзуьмлухрин кьадардал ва вахчузвай бегьеррал гьалтайла, неинки районда, гьакI адалай анихъни вилик жергеда авай майишат яз гьисабзавай. И совхозди гьукуматдин план-тапшуругъар артухни алаз ацIурдай, куьгьнебурун чкадал цIийи уьзуьмлухар кутадай.
Санлай уьзуьмчивал вилик тухуник лайихлу пай кутур уьзуьмчиярни ина гзаф хьана. Абурун жергедай яз МЕГЬЕМЕДОВ Мизамудинан тIвар кьаз жеда.
Сифтедай ада совхоздин хиперни малар хвена, абурун сан артухарна. Гуьгъуьнлай уьзуьмчивилиз атана. И хиле эвелимжи герек агротехникадин вири кIвалахар Мизамудина дериндай чирна, еридивди кьилени тухуз алакьна. Нетижада ада зегьмет чIугваз хьайи А.Къадималиеван, З.Къухмазован бригадаяр анжах вилик жергейра хьана. Къе М.Мегьемедован 83 йис хьанва. Идакай 60 йисуз ада совхозда зегьмет чIугуна.
Гила ина лежбервилин гьвечIи майишатар, арендаторар кардик ква, цIуд гектарралди майданра цIийи уьзуьмлухарни кутунва, абур бегьердални атанва. Уьзуьмлухра зегьмет чIугвазвайбурун арада Мизамудинан стхадин гада Мирзалини ава. Адаз уьзуьмчивилин рекьяй чирвилер гана вердишарайди Мизамудин я. Мирзали вичи кутур 7 гектар багъларихъ гелкъвезва, абурукай 4 гектар уьзуьмлухар я. Мирзали анрихъ вичин хизанни галаз гелкъвезва.
Райсудин Набиев.