- Алай йисуз райондин хуьруьн майишатдин карханайри, лежбервилинни фермервилин майишатри ва арендаторри 1987 гектардин майданрай 4678 тонн техил кIватI хъувуна, - лагьана чаз «Сулейман-Стальский район» муниципальный райондин хуьруьн майишатдин отделдин начальникдин заместитель Гьамидин Абдулкъафарова. – Алай вахтунда вири къуватар къведай йисан бегьер патал никIера тумар цунал желбнава. Санлай къачурла, районда 1800 гектарда тумар цун планламишнава.
Лагьана кIанда, Курхуьруьн зонада гьар йисуз гзаф майданра техилар цазва. Арендаторар тир С. Шайдаева, Т. Таибова, Н. Саругъланова, Т. Сибулаева куьруь са вахтунда 190 гектарда тумар цанва. Санлай абурухъ 250 гектарда тумар цунин фикир ава.
Ингье, Гь. Абдулкъафаровни галаз чун Сефербег Шайдаеван участокда ава.
- За кьве йисан вилик 30 гектар чил 49 йисан муддатда арендада къачунва, ана техилар цазва, - лугьузва С. Шайдаева. – Икьван чIавалди за 23 гектарда тумар цанва.
«Ашагастальский» ООО-да планламиш-навай 300 гектардикай икьван чIавалди 150 гектарда, «Урицский» СПК-да 40 гектарда тумар чилик кутунва.
Къведай йисан бегьер патал «Зардиян» ООО-да 70, «Паласа» ООО-да 100, «Сайтар» ООО-да 105 гектарда техилар цада. И кIвалах анра хъсан тешкиллувал аваз кьилени физва.
Санлай къачурла, икьван чIавалди районда 1300 гектарда тумар цанва, и кIвалах давамни жезва.
Хазран Кьасумов.
