И йикъара «Сулейман-Стальский район» муниципальный райондин администрациядин заседанийрин залда Дагъустан Республикадин жегьилрин крарин рекьяй министерстводин «Жегьилрин инновационный центр» ГКУ-дин директор Ренат Мегьамедов ва анин отделдин начальник Фарман Меликов райондин жегьилрин активдихъ, общественный ва диндин организацийрин руководителрихъ галаз гуьруьшмиш хьана.
Ана общественный хатасузвал хуьнин рекьяй райондин администрациядин Кьилин заместитель Гьажиагьмед Гьажиагьмедова, физкультурадинни спортдин ва жегьилрин крарин рекьяй отделдин начальник Надир Эфендиева, райондин агъсакъалрин Советдин председатель Фахрудин Османова, дяведин ва зегьметдин ветеранрин Советдин председатель Абдулаким Гьажимурадова, райондин имамрин Советдин председатель Гьуьсейн Алискендарова, районда кардик квай ДЮСШ-рин тренеррини руководителри, массовый информациядин такьатрин векилри иштиракна.
Мярекат Гьажиагьмед Гьажиагьмедова ачухна ва кьиле тухвана.
- Чун райондиз Дагъустан Республикадин Кьил Рамазан Гьажимурадович Абдулатипован тапшуругъдалди Кьиблепатан Дагъустандин территориальный округда адан тапшуругъар кьилиз акъудзавай гьал чирунин мурад аваз атанвайди я, - башламишна вичин рахунар Ренат Мегьамедова.- Эхирмижи вахтара республикада, гьабурукай яз райондани диндин, диндинни политический, политический ва миллетчивилин экстремизмдин месэла хцидаказ акъвазнава. Сентябрдин вацра районда кьиле фейи чIуру вакъиайрини республикадин руководстводик секинсузвал кутазва. Гьавиляй районда властдин, чкадин самоуправленидин, къайдаяр хуьдай органрин, общественный тешкилатрин ва общественностдин къуватар сад авун, чкадал жегьилрихъ галаз тухузвай кIвалах гужлу авун, фикир-хиял авуна, гележегдихъ фидай дуьз рехъ хкягъун лазим я.
Гуьруьшдал рахай Фахрудин Османова, Гьуьсейн Алискендарова, райондин самбодинни дзюдодин ДЮСШ-дин директор Тельман Къурбанова, Герейханован хуьруьн ДЮСШ-дин тренер-преподаватель Малик Тагьирбегова, Эминхуьруьн ДЮСШ-дин тренер-преподаватель Мурадагъа Мурадагъаева государстводин жегьилрин политика районда тамамвилелди кьилиз акъудун патал жегьилрин тешкилатрин кIвалах активламишун лазим тирдакай, гьялиз тахьанвай месэлайрикай гегьеншдиз лагьана, чпин теклифар гъана.
Райондин администрациядин Кьилин заместитель Гьажиагьмед Гьажиагьмедова районда кардик квай терроризмдиз акси комиссиядин кIвалахдикай, чкадал ва хуьрерин поселенийра тухузвай заседанийрал гьялзавай месэлайрикай, гьакIни районда авай общественно-политический гьаларикай лугьунихъ галаз санал, Дагъустан Республикадин жегьилрин крарин рекьяй министерстводин «Жегьилрин инновационный центр» ГКУ-дай атанвай мугьманриз метлеблу гуьруьш тухунай муниципальный райондин Кьил Нариман Шамсудинович Абдулмуталибован, администрациядин тIварунихъай чухсагъул малумарна.
Текст кхьейди ва шикил ягъайди Хазран Кьасумов я.
