Чун чи бубайрин веледар тушни?!
Фадлай Махчкъала шегьерда яшамиш жезватIани, кIвалахзаватIани, за садрани жув лезги, Сулейман-Стальский райондин агьали тирди рикIелай ракъурзавач ва и крарал за дамахни ийизва. ГьикI лагьайтIа, лезги халкь камаллу халкь, зи хайи районни кьегьал рухвайринни баркаллу рушарин макан я.
Гьайиф хьи, къе зун «Куьредин хабарар» газетдиз и чар кхьиниз мажбур авурди дамахдай крар туш, къелем за рикI тIар хьайила гъиле кьунва.
Зи хайи районда алай йисуз пуд сеферда террориствилиз акси серенжемар кьиле тухвана. Имни Кьулан СтIалдилай террористриз куьмек гузвай хъиткьинардай шейэр жагъунихъ, райондин куьчейра патрулар яз къекъвезвай полицейскийрин чандиз къаст ийиз алахъунихъ, сентябрдин вацра кьве суткадин къене райондин тамарай гуьлле алай яракьдай яна кьенвай чкадин 5 агьалидин мейитар жагъунихъ галаз алакъалу я. И чIуру, мусибатдин кIвалахар хьанватIани, заз чIалахъ жез, ягъаз кIанзавач: им гьи вахт я террориствилин гьерекатар кьиле физвайди, абур вуч патал ва ни кьиле тухузва?
Инсанривай къе чпин мал-къара гваз ва я кудай кIарасар гьазуриз, чпиз кIерецар, жикIияр, маса емишар кIватIиз тамун гапIалриз, вацIун къерехриз физ жезвач – кичIезва. Тамара, адет яз, вагьши гьайванар я жедайди. Гила лагьайтIа, яракьар гвай бандитар ава.
Зак мад са карди секинсузвал кутазва: зи хайи райондайни са шумуд кас жегьилри Сирияда кьиле физвай женгера иштиракзава, телеф хьайибурни ава. Ватанда кIелдай, кIвалахдай чкадал, чи жегьилрин Сирияда вуч авайди я? Ислягьвал кIани дуьньядин вири общественностди, кьилди къачуртIа, Россиядин яракьлу къуватри Сирияда «Исламдин государство» лугьузвайбурухъ галаз женг чIугвазва, чи жегьилар лагьайтIа, ИГИЛ-дин жергейриз гьахьзава.
Ихьтин крар акурла, за жува-жуваз суал гузва: чун чи бубайрин веледар, невеяр тушни? Чи бубаяр са вахтундани дявейрин, чIуру крарин, къанлувилин терефдарар хьайиди туш.
Зи рикIе тIал ава, гьавиляй завай яргъалди терроризм лугьудай завалдикай, адан зияндикай кхьизни жезвач. Амма зун кIевелай инанмиш я: къайдаяр хуьдай органри, федеральный къурулушрин куьмекни галаз, чи чилелай терроризм ва экстремизм тергда, районда ислягьвили, абадвили агъавалда.
Назим Ханбалаев, ДР-дин Кьилин патав гвай агъсакъалрин Советдин член. Махачкъала шегьер.
