Ингье, 2015-йисан берекатлу зул алукьнава, ам ципицIрин, емишрин, багъ-бустанда авай майвайрин бегьерарни кIватIдай хъсан вахт я. Гьа са вахтунда, къведай йисан бегьердин бине кутадай вахтни тирди рикIел хьун чарасуз я.
Иллаки кьил гъидай магьсулар цун патал талукь кIвалахар авун герек къвезва. И кардин гъавурда Курхуьруьн мулкуна авай арендаторри, лежбервилин гъвечIи майишатрин кьилевайбуру фикир гузва ва зулун кIвалахарни башламишнава.
Кьилди къачуртIа, бул бегьердин бине яз гьисабзавай цанар цунив эгечIнава. Сифтебурукай яз и кардив тежрибалу механизатор ва магьсулдар Шайдаев Сефербег эгечIна.
Ада вахтунда суракьна Сийидрин хуьряй тракторист Къайибханов Гъалибахъ меслят хьана кIвалах башламишна. Ада исятда вичив гвай «Т-150» маркадин гужлу трактордалди йигин еришралди цанар цазва.
Сефербеган участок саки куьтягьзава. Пландик квай 60 гадикай 52 гада еридин кьуьгъверар гьазурнава. Нубатда Тагьирмирзе (20 га), Маллабуба, Девриш (10 га) акъвазнава.
Къуншидалай никIера Гъалибан стха Илифханани еридивди Саругъланов Нариман ва Саругъланов Вилиметан никIера цанар цазва.
Лагьана кIанда «Паласдин рекьин кIаник пад», «Вирерин кьил», «Гуьнейрин кьилер» участокра 30 сантиметрдилай артух деринвал аваз цанвай хъсан еридин кьуьгъверар гьазур хьанва.
КIвалахар лагьайтIа, кьве стхадини пакамаз фад башламишзава, няниз геж куьтягьзава. Исятда никIерал тракторрин ван ала, цанар цун стхайри давамарзава.
Райсудин Набиев, штатдик квачир корр.
