16 йис идалай вилик, 1999-йисан 2-августдин экуьнахъ, вишев агакьна боевикар, сергьятдин шартIар чIурна, Чечен Республикадай Дагъларин уьлкведин хуьрериз гьахьна. Чиндих, Гигатли ва маса са шумуд хуьруьн агьалийрик къалабулух акатна. Международный боевикрин-террористрин мурадар лап чIурубур тирди тайин хьайила, ЦIунти ва Ботлих районрин агьалийриз куьмек гун патал Махачкъалада Интербригада, гуьгьуьллу дагъустанвийрикай са шумуд десте тешкилна, абуру чпин ватанпересвилин буржи намсулудаказ кьилиз акъудна, хайи Ватан-республика душманрикай хвена.
Лянет хьайи дявеяр, женгерин гьерекатар. Абур кьиникьар, бедбахтвилер галачиз жедач. Телефни, асул гьисабдай, михьи рикI авай, дирибаш, кьегьал рухваяр жеда. Гьайиф хьи, международный террористрикай Дагъларин уьлкве азаддайла телеф хьайибурун арада Кьулан СтIалрин хуьряй тир, «Макок» пограничный заставадин начальник яз Ватандиз къуллугъзавай капитан Радим Халикьовни ава. Эхь, рикIе экуь мурадар амаз, багърийрихъ, гъвечIи кьве веледдихъ вил галамаз, жегьилзамаз ам барабарсуз женгина игитвилелди телеф хьана. Къалурай кьегьалвиляй Радим Халикьоваз Россиядин Игитвилин тIвар гана.
Бандтешкилатар кукIварайдалай инихъ 16 йис тамам хьунихъ галаз алакъалу яз райондин информационный агентстводин векилар алатай гьафтеда Кьулан СтIалрин хуьруьз, Радим Халикьован бубани-диде Абдулхаликь ва Ханпери Халикьоврин кIвализ, мугьман хьана.
Игит хва Радим Халикьован экуь къамат рикIел хкунин лишан яз и юкъуз кIвализ патал чкайра яшамиш жезвай Халикьоврин багъриярни хтанвай.
Лугьун лазим къведа, мярекатдиз шадвилинди ваъ, рикIин тIварвилинни хажалатдин мярекат лугьуз жеда.
- Гьелбетда, хва къакъатун гьар са диде-буба патал лугьуз тежер кьван хажалат, рикIин тIарвал, мусибат я, - лагьана Игитдин буба Абдулхаликь Халикьова. – Чи хва Радимни жегьил яз телеф хьана, алчах террористар себеб яз. Амма Радима Дагъустан бандитрикай хуьнин карда ватанпересвал, итимвал къалурна. Эхь, лезги халкьдихъ кьегьал рухваяр вири девирра хьайиди я, чи йикъарани ава. Ахьтин рухваяр галай кьван, зун инанмиш я хьи, чи республика я бандитривай, я экстремистривай, я террористривай кIеве тваз жедач.
- Зун са кардин гъавурда акьазвач: са инсанди маса инсан вучиз яна рекьизва? – суьгьбетдик Радим Халикьован диде Ханпери экечIзава. – Ам гьи миллетдин векил, гьи диндиз икрамзавай кас кIандатIани хьурай, вучиз ам язавайди, рекьизвайди я? Са диндани инсан яна кьин хъсан кар яз къалурнавач. Зи рагьметлу хва Радимакай рахайтIа, инал къейд авурвал, ада хайи республика патал вичин чан пучна. Мисалда лугьузвайвал, инсан халкьдин рикIе амай кьван, ам рекьизвайди туш. Чи хцин тIвар неинки районда, гьакI республикада, Россияда агъзурралди инсанрин рикIера ама, Игит хва яз. Женнетар кьисмет хьурай вичиз! Мадни, лугьузва за, дуьнья ислягь, вирибурун балаяр бахтлу хьурай!
Дидеди, вични Россиядин Игитдин дидеди лагьай гафариз шериквал тийидай кас, зи фикирдалди, бажагьат жеда.
Хазран Кьасумов.