«Сулейман-Стальский район» муниципальный райондин руководстводи эхиримжи вахтара социальный, экономикадин месэлайриз екез фикир гузва. Ида вичин хъсан нетижани гузва: хуьрер авадан, агьалийрин яшайишдин дережа хъсан жезва.
Бубайрин мисалда лугьузва хьи, кIвал гьаятдилай, хуьр-район рекьелай башламиш жезва. Рекьер хатасузбур ва къулайбур хьунилай гзаф крар аслу я, ида муниципалитетдин ва я хуьруьн аваданлувилин дережани къалурзава.
60 агъзурдалай виниз агьалияр яшамиш жезвай, 666,3 агъзур квадратный метридин майдан кьунвай районда 10 километр федеральный, 64 километр республикадин, 207 километр муниципальный метлеб авай, гьакIни 608 километр хуьрерин къенепатанбур тир рекьер ава. Санлай къачурла, абуру 890 километр тешкилзава.
Рекьер туькIуьрунин, абур къайдадик кваз хуьнин кIвалахриз пулунин такьатар федеральный, республиканский ва муниципальный бюджетрай ахъайзава. Районда рекьер къулайбур ва хатасузбур авун патал тайин кIвалахни тухузва. ИкI, 2014-йисуз «Сулейман-Стальское ДЭП-32» ОАО-ди «Мамраш-Ташкапур- Араканский муьгъ» рекье 2,427 миллион, «Курхуьр-КIварчагъ-Сиртыч» рекье 1,786 миллион, чкадин метлеб авай рекьера 2,624 миллион манатдин къимет авай ремонтрин кIвалахар (рекьера акъатнавай фурарин ремонт, рекьерин лишанар-знакар эцигун, автостоянкайриз шир ягъун, инсанар рекьерилай элячIдай чкаяр тайинарун ва абур авун ва масабур) тамамарна.
Идалайни гъейри, алатай йисуз рекьерин фондунин пулунин такьатрин гьисабдай хуьрерин поселенийра 22192985 манатдин къимет авай, алава яз хуьрерин поселенийрин бюджетрин гьисабдай 842 агъзур манатдин къимет авай эцигунринни ремонтрин кIвалахар кьилиз акъудна.
Санлай къачурла, районда рекьер къайдадиз гъунин кIвалахар патал 21 миллион манатдилай виниз пул кутунва.
«О внесении изменений в закон РД «О республиканском бюджете Республики Дагестан на 2015 год и на плановый период 2016-2017 годов» ДР-дин Закондихъ, гьакIни «Об утверждении государственной программы РД «Развитие территориальных автомобильных дорог республиканского, межмуниципального и местного значения Республики Дагестан на период 2015-2017 годов» ДР-дин Гьукуматдин 660-нумрадин къарардихъ галаз кьадайвал, райондин сергьятда рекьер ремонт авунин кIвалахдин программа туькIуьрнава. Адан бинедаллаз кIвалахни тухузва. ИкI, 20I5-йисан алатнавай вахтунда «ДЭП-32» ОАО-дин коллективди «Мамраш-Ташкапур- Араканский муьгъ» рекье 826,4 агъзур, «Курхуьр-КIварчагъ-Сиртыч» рекье 685,7 агъзур, чкадин метлеб авай рекьера 685,7 агъзур манатдин къимет авай ремонтрин кIвалахар кьилиз акъудна.
Алай йисуз «Кьасумхуьр-Цмур» рекье (5 км.) асфальт тун патал 18 миллион манат чара авунва.
2015-2017-йисара «Мамраш-Ташкапур- Араканский муьгъ» рекьин 26+100 километрда муьгъ эцигун патал 75 миллион, «Курхуьр-КIварчагъ-Сиртыч» рекье асфальт тун патал 41 миллион, «Кьасумхуьр-Цмур-Агъа Макьар» рекье асфальт тун патал 35 миллион, «Кьасумхуьр-Шихидхуьр-Зугьрабхуьр» рекье (9 км.) асфальт тун патал 63 миллион манат пул чара авун планламишнава.
Рехъ физвай касди атIуда лагьайвал, инанмишвал ийиз кIанзава хьи, районда рекьер къайдадиз гъунин, цIийи рекьер тухунин жигьетдай гъиле кьунвай ва пландик кутунвай кIвалахар кьилиз акъудиз жеда.
Хазран Кьасумов.
Шикилда: райондин территориядай фенвай республиканский метлеб авай рехъ.
