Малум тирвал, алай йисан 25-февралдиз Дагъустан Республикадин Кьилин ва Гьукуматдин Администрациядин сад лагьай заместитель Исмаил Эфендиеван, Кьиблепатан территориальный округда ДР-дин Кьилин патай тамам ихтиярар ганвай векил Мусафенди Велимурадован, «Сулейман-Стальский район» муниципальный райондин Кьил Нариман Абдулмуталибован, ДР-дин Халкьдин Собранидин депутат Гьамидулагь Мегьамедован иштираквал аваз Агъа СтIалрин къазмайрал 120 аялдиз чка авай «Чубарак» тIвар алай аялрин бахчадин кьве мертебадин дарамат ишлемишиз вахканай.
Мукьвал йикъара «Чубарук» аялрин бахчадиз физвай кьилин куьчеда асфальт тунин кIвалахар кьиле тухуз эгечIнава. Алатай гьафтеда асфальт тунин кIвалахар кьиле физвай гьалдиз килигиз муниципальный райондин Кьил Нариман Шамсудинович Абдулумталибов, райондин администрациядин Кьилин сад лагьай заместитель Лацис Оруджев ва жавабдар маса работникар фена.
Малум хьайивал, куьчеда асфальт тунал Мегьарамдхуьруьн районда кардик квай «Дорстрой» ООО-дин махсус бригада машгъул я.
- Чи карханади райондин администрациядихъ галаз сих алакъада аваз кIвалахиз, райондин хуьрерин рекьера ва куьчейра асфальт тваз 2-3 йис я, - лагьана чаз «Дорстрой» ООО-дин генеральный директор Омар Нагъиева. – Санлай къачурла, чна и куьчеда 2585 квадратный метрдин майданда асфальт твада. И кIвалах акьалтIарайла, райондин руководстводихъ галаз икьрар хьанвайвал, чун Чуьхверхуьрел, федеральный шегьредилай хуьруьн юкьван школадал кьван фенвай рекье ва кьилин куьчеда асфальт тунин кIвалахдив эгечIда.
Лагьана кIанда, Нариман Абдулмуталибов ва амай пешекарар Агъа СтIалрин къазмайрин кьилинбурукай сад тир и куьчеда асфальт тунин кIвалахрин еришрилай ва еридилай рази яз амукьна. И кIвалахни районда кардик квай рекьерин фондунин пулунин такьатрин гьисабдай ийизва.
- Лагьана кIанда, райондин руководстводи эхиримжи вахтара райондин рекьера, хуьрерин куьчейра асфальт тунин кIвалахриз екез фикир гузва, - лугьузва Лацис Оруджева. – ИкI, мисал яз, тек са Кьасумхуьруьн поселенида, райондин ва рекьерин фондунин бюджетрин такьатралди, рекьера ва куьчейра, санлай къачурла, 26370 квадратный метрдин майданда, ДаркIуш къазмайрал 1600 метрда кьилин куьчеда асфальт туна. Алай йисуз и кIвалахар патал рекьерин фондунай 28 миллион манат пул кутунва, Кьасумхуьрел, Сардархуьре ва маса хуьрера кьилин куьчейра асфальт твада. И кIвалахра спонсорвилин куьмек гунай Яралиеврин, Абасоврин, Нуьдуьрбеговрин, Айбатоврин хзанризни райондин руководстводи ва агьалийри чухсагъул лугьузва.
Куьчеда асфальт тунин кIвалахар кьиле физвай гьаларихъ галаз мукьувай таниш хьайидалай гуьгъуьниз Нариман Абдулмуталибов, Лацис Оруджев ва жавабдар маса пешекарар «Чубарук» аялрин бахчадин дараматдизни фена. Анин заведующий Рена Рагьмановади лагьайвал, мукьвал йикъара бахчадиз аялар кьабулда, абурун списокар гьазурнава, бицIекрин диде-бубайрихъ галаз талукь суьгьбетар авунва, бахчада саки 30 касдиз кIвалахдай чкаяр жеда. Бахчадиз герек вири тадаракар, маса шейэрни хканва. Са гафуналди, аялрин бахча бицIекар кьабулуниз гьазур я.
