Чна виликдай хабар гайивал, алай йисан 1-кварталдилай башламишна Кьасумхуьрел кардик квай «Куьредин ярар» культурадин маканди «Куьредин ярар» тIвар алаз эдебиятдин ва информациядин журнал акъудзава. Мукьвара кIелзавайбурал и журналдин 3-нумра агакьна. Ам лезгийрин игитвилин «Шарвили» эпосдин сувариз талукьарнава.
Журнал Дагъустан Республикадин Кьил Рамазан Гьажимурадович Абдулатипов 20I3-йисан 29-июндиз «Шарвили» эпосдин суварик ахцегьиз атуникай кхьенвай макъаладилай, ада суварик авур рахунрилай, гьакIни «Дагъустандин халкьдин сувар» кьил алаз «Шарвили» эпосдин суварин республикадин тешкиллувилин комитетдин председатель, «Дербент шегьер» шегьердин округдин Кьил Имам Музамудинович Яралиева ва «Лезги халкьдин игитвилин лишан» кьил алаз «Сулейман Стальский район» муниципальный райондин Кьил Нариман Шамсудинович Абдулмуталибова кхьенвай макъалайрилай башламиш жезва. И макъалаяр хьиз, журналда ганвай шаир, филологиядин илимрин доктор Фейзудин Нагъиеван «Шарвили» лезги руьгьдин пайдах я», Дагъустандин госуниверситетдин профессор Гьажи Гашарован «Вакъиайрин шагьид», философиядин илимрин доктор, писатель Агьед Агъаеван «Эпический игитвилелай – гьакъикъи игитвилел», РФ-дин журналистрин Союздин член Агьмедпаша Агьмедпашаеван «Шарвили авайвиляй…» макъалаярни мана-метлеб авайбур, гьар са касдик ватанпересвилин гьиссер кутадайбур хьанва.
Журналда къагьриман хва Шарвилидиз ва «Шарвили» эпосдиз, сувариз талукьарна Забит Ризанова, Байрам Селимова, Алирза Саидова, Фейзудин Нагъиева, Абидин Камилова, Хазран Кьасумова, Ражадулагь Салманова, Шамсудин Исаева, Алуван Шагьэмировади ва маса шаирри кхьенвай шииррарни ганва. Абурай Шарвилидихъ вич теснифай халкьдин нефес, Шарвилидин далудихъни халкь галайди аквазва.
Журналда «Шарвили» эпосдикай яратмишдай интеллигенциядин векилар, алимар тир Александр Назаревича, Расул Мегьамедова, Алирза Саидова, Гьажи Гашарова ва масабуру лагьай камаллу келимайриз, «Шарвили» эпосдин сувар Ахцегьа кьиле фейи гьалар къалурзавай шикилризни гегьенш чка ганва.
«Куьредин ярар» журналдин 3-нумра, чна винидихъ лагьайвал, «Шарвили» эпосдиз талукьарнава. ЯтIани, ана «Дербент шегьердин 2000 йис», «Куьредин ярар» центрадин 25 йис», «Тарихдин чинар», «ЦIийи ктабар», «Сагъламвал», «Аялар – чи гъвечIи дустар патал», «ЧIал. Фольклор. Литература» ва маса рубрикайрик кваз ганвай макъалайриз, рикIел хкунриз, литературадин эсерриз, шикилризни еке чка ганва.
Хазран Кьасумов.
