Халкьдин сивера авай риваятрай ва кьисайрай лезгийрин эпосдин игит Шарвили гьейбатлу, чан-тан, къаш-къамат, гьам бедендин, гьам руьгьдин жигьетдай зурба къуват-такьат авай кас яз аквазва. Эхь, Шарвилидин къамат чи халкьдин садрани квадариз тежедай игитвилин лишан я.
Чпин беден мягькемарна, къуват-такьат кIватIна, спортдин рекье виниз тир дережайриз экъечIай, исятдани чIехи турниррани чемпионатра гъалибвилер къазанмишзавай ксар Шарвилидин халис невеяр яз гьисабиз жеда. Багъри чилин гьуьндуьрвал хкажзавай кьегьал рухваяр районда къенин йикъарани тIимил авач.
Герейханован хуьруьн 2-нумрадин ДЮСШ-дин Чуьхверхуьрел кардик квай филиалда алай вахтунда 40 касди армспортдай вердишвилер къачузва ва чпин устадвал хкажзава. Са шумуд касдикай Дагъустан Республикадин, Россиядин, Европадин, дуьньядин чемпионар ва призерар хьанва. ГьикI лугьудач кьван абур Шарвилидин халис невеяр я лагьана?!
Филиалдиз Россиядин Федерациядин лайихлу тренер, спортдин лайихлу мастер Малик Тагьирбегова регьбервал гузва. Ам Шатура ва Челябинск шегьерра кьиле фейи Россиядин, Польшадин Гдыня шегьерда кьиле фейи Европадин чемпионатрин, Москвада хьайи «Къизилдин сев» международный турнирдин призер, Финляндиядин Рованиэми шегьерда кьиле фейи дуьньядин чемпионатдин гъалибчи я. М. Тагьирбегова гьакIни Азербайжандин ачух чемпионатдани 1-чка кьуна.
Малик Тагьирбегован ученик, алай вахтунда филиалда тренервиле кIвалахзавай Рамидин Къазимегьамедовни са шумуд сеферда Россиядин, Европадин ва дуьньядин чемпион, спортдин лайихлу мастер я.
Филиалдиз фейила, М. Тагьирбегова чун вичин ученик, 75 килограммдин заланвиляй Россияда къуватлу спортсменрикай сад тир Эрзиман Алисултановахъ галаз танишарна.
Малум хьайивал, Эрзиман армспортдал машгъул жез 8 йис я. И йисара адакай са шумуд сеферда, гьабурукай яз алай йисузни, Дагъустан Республикадин чемпион хьана. Алатай йисуз ада Россиядин чемпионатда 1, Европадин ва дуьньядин чемпионатра приздин 2-чкаяр кьуна.
Лагьана кIанда, тренервиле кIвалахни ийиз, М. Тагьирбегова вичини чIехи дережадин турнирра ва чемпионатра иштирак авун давамзава. ИкI, алай йисуз Малик Тагьирбегова ва Эрзиман Алисултанова Малайзияда кьиле фидай дуьньядин чемпионатда иштиракда.
М. Тагьирбегован мад са ученикди – Гьажи Керимова Дагъустан Республикадин кIвенкIвечивал патал алай йисуз Дербент шегьерда кьиле фейи чемпионатда I-чка кьуна. Ам Вирироссиядин турниррин призерни я.
… Заз акI я хьи, чи кьегьал рухваяр тир Малик Тагьирбегован, Эрзиман Алисултанован, Гьажи Керимован рикIе, ивида, бейнида Шарвилидин руьгь гьатнава. Абуру гьар йисуз Ахцегьа кьиле тухузвай лезгийрин игитвилин «Шарвили» эпосдин суварин мярекатда иштиракзава, Малика акъажунрин судья, Гьажиди ва Эрзимана гъилер кьунай акъажунрин иштиракчияр яз чпин алакьунар, устадвал къалурзава.
Лезги халкьдин, чилин ад хкажзавай Шарвилидин невеяр сагърай ва абурухъ мадни чIехи агалкьунар хуьрай!
Хазран Кьасумов