Лезги халкьдин «Шарвили» къагьриманвилин эпосдин чIехи суварин вилик квай и йикъара Курхуьр 1-нумрадин юкьван школадин актовый залда алай литературадин йисан юбилярар тир вичин уьмуьрдин 80 йисан гатфар къаршиламишзавай Дагъустандин культурадин лайихлу работник, вичин вири савадлу уьмуьр хайи халкьдиз руьгьдин жигьетдай къуллугъ авунин кардиз бахшнавай машгьур манидар ва культработник Бесхалум Гьажиевадин ва и хуьруьнви муаллим, писатель ва фотожурналист, РФ-дин журналистрин Союздин член Райсудин Набиеван 75 йис тамам хьунин юбилейриз талукьарнавай шадвилин мярекат кьиле фена. Ам райондин культурадин Дворецдин къуллугъчи конферансье ва манидар Ярагьмед Ярагьмедова ачухна ва кьиле тухвана.
Юбилярдин гьакъиндай анал куьруь гаф ва тебрикдин хуш келимаяр гваз Курхуьруьн поселенидин администрациядин Кьил Гьажалиев Радик Ризванович рахана. Ада хуьруьн поселенидин администрациядин патай абуруз къиметлу пишкешар гана.
Гаф и мярекатда иштирак ийиз атанвай муниципальный райондин Кьил Нариман Шамсудинович Абдулмуталибоваз гана.
Юбилярриз чпин уьмуьрда кьиле физвай и лишанлу вакъияр райондин депутатрин Собранидин, муниципальный райондин администрациядин ва гьакIни вичин патай мубарак авунихъ ва тебрикдин гафар лугьунихъ галаз санал Н. Ш. Абдулмуталибова абуру райондин культурадин ва общественный уьмуьрда еке иштираквал ийизвайдини къейдна ва абурув райондин Грамотаяр шад гьалара вахкана.
Юбилярдин тIварцIихъ тебрикдин хуш келимаяр гваз межлисдал Курхуьруьн 2-нумрадин юкьван школадин директор, ДР-дин халкьдин муаллим Н. Алхасов, «Куьредин ярар» культурадин центрадин регьбер А. Агьмедпашаев, шир Сажидин, машгьур манидар ва шаир Зайнаб Султанагьмедова, и цIарарин автор, хуьруьн 1 ва 2-нумрайрин юкьван школайрин са жерге муаллимар ва юбиляррин багърияр, дустар рахана.
И межлис аниз хтанвай мугьман манидар Зайнаб Султанагьмедовади, гьакIни райондин Культурадин Дворецдин манидарри мадни гурлу авуна.
Эхирдай анал рахай юбилярар тир Бесхалум Гьажиевади ва Райсудин Набиева чпин гьуьрметдай ихьтин гурлу межлис къурмишунай, чпин зегьметдиз еке къимет гунай хуьруьн ва райондин руководителриз чухсагъул лагьана, чпин патай манияр багъишна.
А. Камилов.