Забит Ризванов, Байрам Салимов
ШАРВИЛИДИН ТАРИФ
Гатфарилай — гатфаралди,
КIватI вири са-сад, са-сад,
Дагъларилай — дагъларалди
Авурди чи Ватан азад
Припев:
Шарвили я, Шарвили чи,
Авунвайди тIвар вине чи!
Шарвили я, Шарвили чи,
Авунвайди тIвар вине чи!
Тур къуьнера акьадамаз
Душмандин рикI авудайди,
Гуж-гужунив рахадамаз
Ватан виниз акъудайди
Герек чIавуз халкьдиз пехъи
ВацIар кьулухъ элкъуьрайди,
Чи дагълара, кьилер рехи,
Рекьер цIийи туькIуьрайди
Кьегьалар хьухь лугьуз чаз къе,
Гьар са касдив рахазвайди,
Къагьриманвал тваз чи рикIе,
Лезги чилел аквазвайди
Абдулкъадир Сайдумов
Лезги халкьдин пагьливан
Игитвилин чи эпосдин,
Сувар я къе шадвилин.
Риваятрин Шарвили хва,
Вун гьунар я садвилин!
Лишанлу югъ, къван эцигдай
Ви гуьмбетдин атанва.
Ви гьуьрметдай къадим Ахцегь
Къе мугьманрив ацIанва.
Суьгьуьрдин тур гъиле аваз
Вун виринра машгьур я.
Гьамиша ваз икрам ийиз,
Чун уьмуьрлух гьазур я.
Милли руьгьдин гъалибвилел
Чаз азадвал гъайиди.
Гъейрат, намус, михьиз хвена
Чи къайгъудар хьайиди!
Гьамишалугъ амукьда вун,
Риваятрин къагьриман.
Несилриз вун чешне жеда,
Лезги халкьдин пагьливан!
Алирза Саидов
ВЕСИ
Ажал пайиз, жаллатIар яд чилерин
Атана чал ийиз чапхун, фасадвал.
Тур хкажна Шарвилидин гъилери,
Хуьн паталди хайи халкьдин
азадвал.
Гапур хьанач фейи чIавуз дяведиз
Чин-чинаваз уьтквем кьилихъ
галукьай,
- Хайи хуьре са хаинди гуьлледив
КIири Буба яна бирдан кьулухъай.
Шарвилидин веси- тур я вижевай.
КIири Бубад веси я: хуьх игьтият –
Жуван кIвале декьин патал чинеба,
Хаинрал гьич ийиз тахьуй ихтибар!
Сажидин
ЛЕЗГИСТАНДИХЪ МАДНИ МАШГЬУР АД ЖЕДА
Лацу шегьер, КIеледин хев,
Шалбуздагъ!
Шагьидар я эбеди тир кьилел рагъ.
Шарвилини адан несил сагъ я, сагъ!
Абур хьана, абур ава, мад жеда!
Лезгистандихъ мадни машгьур ад
жеда!
Диде чили Шарвилидиз хур гана,
Лезги халкьди адан гъиле тур гана.
Вили цаву цIайлапанрив нур гана.
Чапхунчияр яд хьана ва яд жеда!
Лезгистандихъ мадни машгьур ад
жеда!
Мегьамед ал-Ярагъвияр? Эминар,
Сулейманар я чи халкьдин заминар!
Гьикьван чна лагьайтIани аминар,
Женг чIугуна авур кIвалах фад жеда!
Лезгистандихъ мадни машгьур ад
жеда!
Игитвилин гьисс хкажиз цавариз,
Чи гьар са югъ тешпигь жеда
сувариз,
Шарвилиди къуват гузва лувариз,
Дагъдин лекьер вири санал кIватI
жеда!
Лезгистандихъ мадни машгьур ад
жеда!
Шагьабудин Шабатов
ШАРВИЛИ Я, ШАРВИЛИ
Кьве агъзур йис, адалайни пара я,
Анлай инихъ тарихарни хара я,
Амма ам чаз виридалай багьа я.
Вуж тир а кас? — Шарвили я,
Шарвили.
Хайи чили кьунай вичин кIула ам,
Уьтквемвили, гьакIни хвенай чIала
ам,
Дагъ хьиз къвазнай чапхунчийрин
хура ам.
Вуж тир а кас? — Шарвили я,
Шарвили.
Женнетдин юкь - квайни квай чIук
чил хвейи,
Чарадан мал къакъуд тавур, гъил
хвейи,
Фагьумсуз тир къурабайрин кьил
хайи.
Вуж тир а кас? — Шарвили я,
Шарвили.
Валай чешне къачузва гьар
лезгиди.
Кутаз жедач рехне михьи
гуьзгуьдик.
На чун хьиз, чи гележегни экуьник
Кутун патал ялда чна, Шарвили.
Шагьабудин Шалбуз дагъдин пад
хьтин,
Агакьнавай бул бегьердин гад
хьтин,
Михьивилиз абукевсер яд хьтин,
Ви весийриз вафалу я, Шарвили!
