Алай йисан 1-августдиз къадим Ахцегьрин хуьре игитвилин «Шарвили» эпосдин сувар 16-сеферда кьиле тухуда. И сувар лезги халкьар хъсан крарал тупламишунин, абур руьгьдин жигьетдай мягькем ва девлетлу авунин, дуствилинни садвилин, ислягьвилинни ватанпересвилин мана-метлебдин, вичиз тешпигь авачир хьтин вакъиадиз элкъвенва.
2009-йисуз «Шарвили» эпосдин сувар 10-сеферда тухудай юкъуз, Ахцегьа Келез хивел Шарвили пагьливандин гьуьндуьр къаматдин пак руьгьдин ва къадим заманайра инал хкажнаваз хьайи адан къеледин лишан яз эцигнавай ротонда ачухнай.
- Ротонда ачухун неинки игитдин руьгьдиз гьуьрмет авунин лишан я, ада алай девирдани чун игитвилин эпосдилай гьакъикъи игитвилерихъ инанмишвилелди физ гьазур тирдини гьакъикъатда тестикьарзава, - къейднай гьа мярекатдал сувар тухунин тешкиллувилин комитетдин председатель Имам Музамудинович Яралиева.
Вичин метлеблу, гьар са касдиз таъсир авур рахунрин арада И. М. Яралиева мадни къейд авунай: «… федеральный «Кавказ» шегьре рекьин къерехда, ЦIийи Макьарин хуьруьн патав гвай Къухмазан кIунтIал «Шарвилидин памятник» тIвар ганвай культурно-мемориальный комплекс туькIуьрун патал проектдинни сметадин документация заказ вуганва. И комплексдал культурадин чIехи серенжемар, гьа гьисабдай яз «Шарвили» эпосдин суваррин мярекатарни тухуда. Ина гьакIни тарихдин музейдиз, библиотекадиз, аудио ва видеотекадиз, художественный галереядиз, выставкайрин залдиз чкаяр жеда ва комплексдихъ галаз алакъалу маса къурулушарни арадал гъида…».
Гьелбетда, ихьтин чIехи комплекс эцигун пулунин еке такьатрихъ галаз алакъалу я. «Шарвили» эпосдин суварин тешкиллувилин коми-тетди, Сулейман-Стальский райондин руководстводи Къухмазан кIунтIал комплекс эцигун патал еке кIвалах тухузва. И баркаллу кардик чпихъ мумкинвилер авай гьар са касди пай кутунайтIа, мадни хъсан жедай, кIвалахар вилик фидай.
Хазран Кьасумов.