Ингье мадни, гила 16-сеферда (2000-йисалай инихъ), къадим Ахцегьа-дагълара авай шегьерда-вич тешкилуник ва къейд авуник лезги халкьдин бажарагълу регьбер ва баркаллу хва Имам Музамудинович Яралиева еке пай кутур ва кутазвай лезги халкьдин игитвилин эпосдин сувар 1-августдиз кьиле тухузва.
Шарвили, лезги халкьдин зигьинди асирра арадал гъанвай игитвилинни садвилин, датIана уяхвилин лишан яз, а тIварцIел гьамиша дамахзавай. Гила а тIварцIин гьуьндуьр мадни вине хьанва.
Ахцегьа «Шарвили» эпосдин сувар тухуни неинки са лезгияр, гьакI Дагъустандин вири халкьар уяхарнава, тупламишзава. Вучиз лагьайтIа, Шарвилиди, лезги халкьдин руьгьдин къагьриман яз, амай халкьарин гьарайдизни гьай лугьузва.
Инал чи рикIел «Шарвилидин» сад лагьай суварик а чIаван чи республикадин милли политикадин, информациядин ва къецепатан алакъайрин рекьяй министр рагьметлу Мегьамед-Салигь Гусаева лагьай гафар хквезва. Ада къейднай хьи, ихьтин зурба эсер яратмишун лезги халкьдин акьалтIай чIехи игитвал я . Эпосдин гьар са цIар халкьарин садвилин, дуствилин фикиррив ацIанва. Къенин суварни чи вири халкьарин садвилинди я!
Шарвили са халкьдин ваъ, вири халкьарин игитвилин лишан яз, адаз ийизвай гьуьрмет ва гузвай фикир артух жезвайди чаз алатнавай 15 йисуз кьиле тухвай суварри ачухдаказ раиж авуна. Суварик къвезвай ва Шарвилидин конкурсра иштиракзавай ксарин кьадар артух хьунилай гъейри, географияни гегьенш хьана. Суварик Рутулайни,Агъулайни, Хивдайни, Табасарандайни, КцIарайни, Дербентдайни, Хасавюртдайни, Каспийскдайни ва иллаки Махачкъаладай къвердавай гзаф инсанар хквезва.
Суварин иштиракчияр тебрикзавай телер Москвадайни, Санкт- Петербургдайни, Тюмендайни, Краснодардайни, Бакудайни ва маса чкайрайни къвезва. Дагъустандин халкьарин саки вири векилрилай. Гьавиляй лугьузва: «Шарвилидин» сувари чи халкьарин къанажагъда къвердавай дурумлу чка кьазва. Савадлу са дагъустанвидини гила «Шарвилидин» суварикай ва я сувариз майдан гайи эпосдикай чпиз хабар авачирди къалурзамач.
«Эхь, эпос авай халкь эбеди яшамиш жедай халкь я»,- лагьанай вичин рахунра сад лагьай суварин мугьман, РФ-дин Госдумадин депутат Гьажимет Сафаралиева.
Инал мад сеферда «Шарвилидин» сувариз вичин руьгьдин, рикIин эмирдалди къуват гайи, суварин асул метлебар гьихьтинбур ятIа къимет гайи арифдар алим, рагьметлу Агьед Агъаеван «Шарвили халкьдиз гьамиша герек я!»- лагьай гафарин чIехивал, экуьвал, гьахълувал рикIел хкун тавуна жезвач.
«Шарвилидин» икьван чIавалди тухвай вири суваррин кьиле акъвазай регьбер, чи халкьдин алай аямдин уьтквем рухвайрикай сад тир Имам Музамудинович Яралиеван сифтегьан ва адалай гуьгъуьнизни авур докладрин, лагьай келимайрин кесерлувал садрани квахь тийидайдини къейдна кIанда.
«Суалар арадал атун мумкин я: вучиз чна Шарвилидикай эпос квез мубаракзава, тебрикзава? Вучиз гьар са лезгиди ам кIелун тIимил я, ам руьгьдалди кьабулна кIанда?» - къейднай ораторди а чIавуз вичин рахунра. Жавабарни гана.
«Сад лагьайди, жемятар, эпосдин кьилин фикир халкьдин гьал-агьвал вини дережадиз акъудун ва хайи Ватан кIан хьун я. Эпосда Ватандал дамах авунин руьгь къалурнава...
Ватандиз Шарвили хьтин игитар сад- кьвед ваъ, вишералди герек я.
Кьвед лагьайди, гьикьван пислемиш авуртIани, дявеяр виликдайни авай ва исятдани жезва.. «Шарвили» эпосдин сувар тухунин себебни халкьдиз къагьриманвилин тербия гунин крарик къуьн рикIивай кутун я...»
Гена алава хъувунай: «Халкьдин гьал-агьвал хкажун, Ватан кIан хьун, ам душманрикай хуьз гьазур хьун- ингье и су¬варин асул метлебар...»
А. Камилов, шаир.
