27-июлдиз «Сулейман-Стальский район» муниципальный райондин администрациядин нубатдин заседание хьана.
Муниципальный райондин Кьил Нариман Шамсудинович Абдулмуталибова кьиле тухвай заседанидал агъадихъ галай месэлайриз килигна:
1. Муниципальный райондин административный комиссиядин 2015-йисан 1-паюна тухвай кIвалахдин гьакъиндай.
2. Государстводин хсусиятда авай хуьруьн майишатдин метлебдин чилерин сергьятар тайинарунин рекьяй «Муниципальный эменнидин ва чилер ишлемишунин управление» МБУ-дин кIвалахдин гьакъиндай.
3. Жуьреба-жуьре месэлаяр.
Заседанидал алай 1-месэладай административный комиссиядин секретарь Шевкет Ярагьмедова, 2-месэладай МБУ-дин директордин заместитель Назир Гьасанова информацияр авуна.
И месэлайрай анал чпин фикирар гваз архитектурадин, эцигунрин ва ЖКХ-дин отделдин начальник Мустафа Мустафаев, «сельсовет Касумкентский» хуьруьн поселенидин кьилин заместитель Фазил Мамедяров, администрациядин правовой отделдин кьилин пешекар Баламет Ширинов, администрациядин кьилин 1-заместитель Лацис Оруджев (сад лагьай месэладай), Федеральный кадастровый палатадин ГБУ-дин начальник Герман Демиров, Росреестрдин С-Стальский районрин уртах отделенидин руководитель Нариман Мейланов, межевой группадин кьилин пешекар Зумрудин Гьайвазов, «сельсовет Ашагастальский» хуьруьн поселенидин администрациядин кьил Низами Абдурагьманов, «сельсовет Новомакинский» хуьруьн поселенидин администрациядин кьил Асамудин Къазиагьмедов (кьвед лагьай месэладай) рахана.
Заседанидал Н. Ш. Абдулмуталибова 1-августдиз къадим Ахцегьрин хуьре 16-сеферда кьиле тухузвай лезгийрин игитвилин «Шарвили» эпосдин сувариз районда акунвай гьазурвилерикай, суварик райондин агьалийри иштирак авун патал план-график туькIуьрнавайдакай, талукь гьазурвилер акунвайдакай гегьеншдиз суьгьбетна, и рекьерай организацийрин, карханайрин, хуьрерин поселенийрин вилик акъвазнавай алава везифайрикай лагьана.
Заседанидин кIвалахдин нетижаяр Нариман Шамсудинович Абдулмуталибова кьуна.
