Чкайрал фейила чаз акурвал ва хуьруьн майишатдин пешекарри гьахълудаказ къейд ийизвайвал, алай йисуз магьсулдарри никIера техилдин тарифдин бегьер битмишарнава.
- Хъсан бегьер битмишарун – им агалкьунар хьанва лагьай чIал туш, - лугьузва райондин хуьруьн майишатдин отделдин начальник М. Бабаева. – Агакьнавай бегьер вахтунда ва пучвилер авачиз кIватI хъувунни лазим я. И кардал алай вахтунда 10 комбайни машгъул я. Абуру план-графикдин бинедаллаз нубат-нубатдалди карханайрин никIерай гад агудзава. «Зардиян» зонада и кIвалах акьалтIарнава.
Гьакъикъатдани, «Ашагастальский», «Горец» ООО-ра, «Новый путь», «Шах-Абусар» СПК-ра, «Кюре» ПО-да ва маса карханайра, кьилдин ксарин арендадин участокра техилдин хъсан бегьер агакьнава. Икьван чIавалди районда 700 гектардилай виниз майданрай гад агуднава. Юкьван гьисабдалди, гьар са гектардай 27 центнердив агакьна техил кIватI хъийизва.
Карханайрин харманрал техил михьи авунин, складриз вахчунин кIвалахарни хъсан тешкиллувал аваз кьиле физва.
Х. Гьажибалаев.