Гад гьарай я, - лугьузва бубайрин мисалда. И кар аннамишнавай «Куркент» СПК-дин магьсулдаррин къайгъуяр и йикъара къалин хьанва. Абурун вилик саки 200 гектардин никIерай гад агудунин везифа акъвазнава. И кардал пуд комбайни машгъул я.
Ингье, чун магьсулрин никIе ава. Кьезил шагьвардал лепе гузвай, къизилдин ранг акьалтнавай никIер акурла гуьгьуьл шад жезва.
Юкьван гьисабдалди, никIерин гьар са гектардай 20 центнердилай виниз техил кIватI хъийизва.
СПК-дик акатзавай арендаторар тир Т. Таибован, М. Эскендарован, Къ. Бабаеван участокрай техилар кIватIна акьалтIарнава. Алай вахтунда и кIвалах В. Саругъланован, П. Абдурагьманован участокра кьиле тухузва.
Лагьана кIанда, комбайнерар тир Ф. Муданова, Н. Исмаилова ва Х. Абдулкъафарова чпин хиве авай везифаяр намуслудаказ, жавабдарвал гьисс авуналди кьилиз акъудзава.
Техилар кIватI хъувур никIера пресс-подборщик галай трактордалди самар туьквера кьазва. И карда механизатор Т. Шайдаева, рабочияр тир Н. Ибрагьимова, Л. Шайдаевади, Р. Ибрагьимовади ва А. Селимова тафаватлувал къалурзава.
«Куркент» СПК-да гад агудунин кIвалахар давам жезва.