ТIебиатдин къанун я: къведа инсан дуьньядал, кечирмишда уьмуьр, хъфида ам эхиратдин кIвализ. А касди уьмуьр гьикI кьиле тухвана, адалай вуч алакьна, ада вичелай гуьгъуьниз гьихьтин гел, тIвар туна? И кар лап важиблу я.
Ингье, зи вилик Дагъустан Республикадин культурадин лайихлу работник, лезги писателрин Союздин Сулейман-Стальский райондин отделенидин председатель, «Куьредин хабарар» газетдин редактордин заместитель Абидин Камилован гъиликай хкатнавай, мукьвара Кьасумхуьрел кардик квай «Куьредин ярар» культурадин центрадин типографияда чапдай акъатнавай, «Вири уьмуьр – ачух ктаб я» («Вся жизнь – открытая книга») тIвар алай ктаб ква. Ам урус чIалал кхьенва.
Ктаб Ватандин ЧIехи дяведин иштиракчи, яргъал йисара жавабдар къуллугъар авур, саки 60 йисуз хуьруьн мухбир хьайи Салманов Батман Салмановичан уьмуьрдин ва зегьметдин рекьикай кхьенва. Ам 85 йисан яшда аваз 2007-йисан 21-августдиз рагьметдиз фена. ЯтIани, уьмуьрда баркаллу рехъ фейи Батман Салманович инсанрин рикIера къени ама. Чун рахазвай ктаб акъудун и кардин шагьид я.
Ктаб «Чнани шадвал ийизва», «Лекьерин муг», «РикIин гьарай», «Дяведин рекьер», «Ветерандин рикIел хкунра», «Б. Салманован Сталинграддин женгер», «Ислягь уьмуьрдани дяведа хьиз я», «Журналистика ва несигьатчивал», «Баркаллу хзандин сагьиб» ва маса кьилерикай ибарат я.
«Дяведин рекьер» кьиляй малум жезвайвал, пияда кьушунрин училище куьтягьай младший лейтенант Б. Салманова взводдин командир яз, Сталинграддин патав кьиле фейи къати женгера иштиракна. 1942-йисан августдиз адан кьве кIвачелни залан хирер хьана. Ругуд вацра госпиталда сагъар хъувурдалай гуьгъуьниз Б. Салманов, фронт патал аскерар ва младший офицерар гьазурун патал, Оренбургский областда авай 365-запасной бригададиз ракъурна. Гъалибвал къачурдалай гуьгъуьниз хурудал «Сталинград хуьнай», «Германиядин винел гъалиб хьунай» медалар алаз ам Ватандиз хтана.
Ислягь зегьметдив эгечI хъувур Батман Салманова Мегьарамдхуьруьн райкомдин секретардин куьмекчивиле, райкомдин пропогандадинни агитациядин отдалдин заведующийвиле, КПСС-дин Кьасумхуьруьн райкомдин кьвед лагьай секретарвиле, исполкомдин председателвиле, Хив райондин сад авунвай «Октябрдин экв» газетдин редакторвиле, Кьасумхуьруьн консервиярдай заводдин директорвиле ва жавабдар маса къуллугърал намуслудаказ кIвалахна.
ВикIегь бубадихъ усал веледар жедач, лугьузва мисалда. Батман Салмановичан 3 веледдини бубадин баркаллу рехъ уьзуьагъдаказ давамарзава.
Ктабда Б. Салманова газетриз кхьей «ЧIехи Гъалибвилин бине», «Мухбир яз – 60 йис» макъалаяр, «Къизилдин гъилер» очерк, гьакIни ветерандихъ галаз алакъалу гзаф кьадар шикиларни гьатнава.
«Сулейман-Стальский район» муниципальный район спонсор яз акъуднавай ктабдин тираж I00 экземпляр я.
Са рахунни алачиз, ктабдикай акьалтзавай несилдиз женгининни патриотвилин тербия гун патал муаллимривай менфят къачуз жеда.
Хазран Кьасумов, ЛПС-дин райондин отделенидин секретарь.
