Гьа и кардай руьгьди игитвилин эпосдилай гьакъикъи игитвилихъ, ихьтин арачивал аваз, еримишун аквазва. Гьа и рекье гьиссер ахлакьдин жигьетдай михьи ва эдеблу жезва. I999-йисан августдинни сентябрдин бедбахтвилин йикъара халкьдин ян тагур руьгьдин гъалибвал акьван жанлудаказ ачух хьун дуьшуьшдин кар туш эхир. Гьа икI, игитвилин эпосни гьакъикъи игитвал зигьиндин къуватдалди алакъалу ийиз жез¬ва. Гьакъикъи игитвиликай рахайтIа, адаз уьмуьрда гьамиша чка жагъизвайди я. Ингье гьа иниз килигна халкьдин руьгьдинни медениятдин ирсиникай алай аямда, тербиядин кIвалахда менфят къачун чарасуз я.
Байрам Салимов:
Къейд авун лазим я хьи, са жерге маса халкьарин эпосрилай тафаватлу яз Лезги халкьдин эпосдин кьилин игит жергедин дагъвидин- чубандин хва я. Халкьди гьахъ- адалатдикай вичин эрзиман мурадар Шарвилидин къаматда аваз умумиламишнавай тегьерда къалурнава. Вичин рикIин мурад кьилиз акъудун патал халкьди Шарвили лап зурба къуват авай кас яз къалурзава. Ам кичIевал вуч затI ятIа чин тийир дирибаш аскер, женгина гьикьван четинвилер расалмиш хьайитIани, душмандин вилик руьгьдин ажузвал тавуна, кIеверай экъечIиз алакьзавай кас я.
Наталья Капиева:
Лап эхиримжи вахтаралди литературада кIевелай тайин хьанвай фикир авай: лезгийрихъ халкьдин эпос «Шарви¬ли» авач. КилигайтIа, ам авазва! Вични художественный рекьяй лап девлетлуди, мана-метлебдал гьалтайла - лап инсанпересди!
Ризван Ризванов:
Шарвили - халкьди вичи-вичиз ва къвезвай несилриз хкажнавай, садрани пуч тежедай гуьмбет я: Шарвили - им жегьилрин викIегьвал, рушарин такабурвал, бубайрин давамарун ва дидейрин даях я.
Арбен Къардаш:
Лезги халкьдиз руьгьдин рузи ва къу¬ват гузвай чIехи ва мидаим пуд ярж (сим¬вол) ава: Шалбуз дагъ, Кьулан вацI ва Шарвили. Ибур чи миллетдин пуд даях я. Пуд кIвач квай куьсруь гьинал эцигайтIани ярх жедач. Чи халкьдивай тарихдин мичIи даркалрайни буьркьуь уламрай вичин чIални, чилни, руьгьдин садвал хвена экъечIиз хьунин сирни гьа и пуд «кIваче» ава жеди.
Фейзудин Нагъиев
ШАРВИЛИ
Ирид йисуз дад-бидадна гъуцариз,
Диде-чили велед хана-Шарвили!
Къилав гудай бубайрин пак турариз,
Тик тIаратI хъиз, кьадай халкьдин тIвар
виниз!
ПРИПЕВ:
Шарвили, Шарвили!
Шарвили, Шарвили!
Герек тирла женгериз
КIелед хивел къведа чун.
Ваз пуд сеферда,
Ваз пуд сеферда,
Ваз пуд сеферда,
Эвериз!
Шарвили! Шарвили! Шарвили!
Зи лезги чил къагьриманрин макан я.
Пайдах хъиз яхъ гьар кьегьалдин тIвар
вине.
РикIер хуррам, руьгьер кIеви, кьакьан я.
Гьар са кьегьал я чи далу, Шарвили!
ПРИПЕВ: (тикрар жезва)
Шумуд къузгъун атанвай чи чилерал,
Зи лезги халкь магълуб хьанач дарвилиз.
Лигим хьана чун баркаллу женгера,
Чахъ цIай хьтин чи руъгь хьана, Шарвили!
ПРИПЕВ: (тикрар жезва)
Сажидин Саидгасанов
ША, ДАГЪВИЯР
Ша, дагъвияр, шадвал ийиз суварик,
Лекьери хьиз гар кутан чи луварик.
Гьикьван дамах кватIа тамаш цаварик!
Куьз лагьайтIа, къагьриман я Шарвили!
Лезги халкьдин эрзиман я Шарвили!
Хкаж хьана ам кьакьан тир дагълариз,
Азадвал хуьз эвер гузва халкьариз.
Къадиматда зур гайиди шагьлариз,
Дуьз лагьайтIа, къагьриман я Шарвили!
Лезги халкьдин эрзиман я Шарвили!
Ам авачир чка Дагъда, Аранда
Аквадач квез. Жеда гьатта Иранда.
Ам машгьур я, гьам Румда, гьам
Туранда.
Куьз лагьайт!а, къагьриман я Шарвили!
Лезги халкьдин эрзиман я Шарвили!
Чун бахтлу я и дуьньяда ад аваз,
Гьулданарни лигимардай чад аваз.
АкуртIани игитар чахъ мад аваз,
Дуьз лагьайтIа, къагьриман я Шарвили!
Лезги халкьдин эрзиман я Шарвили!
Азад Къафкъаз багьа я чаз виридаз,
Гьар са хци жаваб гудай иридаз.
Аферин я Диде Ватан хвейидаз!
Куьз лагьайтIа, къагьриман я Шарвили!
Лезги халкьдин эрзиман я Шарвили!
Мошаллагь шаирар!