28-майдиз «Сулейман-Стальский район» муниципальный райондин депутатрин Собранидин 12-сессия кьиле фена.
Адан кIвалахда Собранидин депутатрилай гъейри райондин администрациядин управленийрин, отделрин руководителри, хуьрерин поселенийрин кьилери иштиракна.
Сессиядал алай месэлайрикай лугьуналди, ам муниципальный райондин Кьил, депутатрин Собранидин Председатель И. М. Яралиева ачухна ва кьиле тухвана.
Депутатри муниципальный райондин Уставда дегишвилер ва алаваяр тунин гьакъиндай вирида сад хьиз сес гуналди, къарар кьабулна.
«Райондин сергьятда газ тухванвай линияр муниципальный хсусият яз тайинарунин гьакъиндай» месэладай анал райондин эменнидин, чилерин алакъайрин комитетдин председатель Н. К. Алискеров рахана. И месэладай депутатри талукь къарар кьабулна.
«Сулейман-Стальский райондай тир, республикадин вузра кIелзавай кьетIен лайихлувилер авай студентар гьевесламишунин серенжемрин гьакъиндай» ва «Муниципальный райондин Гербдин чешне, пайдахдин кIалуб ва гимндин гафар ва музыка тесниф авунин патахъай конкурс малумарунин гьакъиндай» Собранидин аппаратдин руководитель Р. А. Абдулазизова информация авуна.
Сессиядал тешкиллувилин месэлайризни килигна.
Гьа иналди сессияди вичин кIвалах акьалтIарна.
