Малум тирвал, чи республикадин маса районра хьиз, чи райондани алай йисан 26-майдилай райцентрдал агьалийриз жуьреба-жуьре рекьерай гьукуматдин ва муниципальный къуллугъар ийидай центр (МФЦ) кардик акатнава. И карди неинки са чи райондин, гьакI къунши районрин агьалийризни еке регьятвал ва къулайвал яратмишнава. Куьруь са вахтунда эцигна куьтягьна, алай аямдин истемишунрихъ галаз кьадайвал тадаракламишнавай и са мертебадин гуьзел дараматди райцентрдал абур гъанва лагьайтIа, чун са кIусни гъалатI жедач.
Алатай киш юкъуз, 20-июндиз, райцентрдал МФЦ шад гьалара ачухуниз талукьарнавай мярекат кьиле фена.
Ана иштирак ийиз чи республикадин меркездай ДР-дин алакъадин ва телекоммуникацийрин министрдин везифаяр тамамарзавайди тир Малламегьамедов Юсуп Мегьамедович ва «МФЦ в РД» ДР-дин ГАУ-дин директор Хасбулатов Осман Хасбулатович атанвай.
Югъ нисини жедайла кьиле муниципальный райондин Кьил Нариман Шамсудинович Абдулмуталибов аваз атанвай мугьманар ва райадминистрациядин са жерге къуллугъчияр МФЦ-дин дараматдин вилик атана. Абур, хъсан адет хьанвайвал, милли парталар алай зуьрнечийрин дестеди туьнт авазар ягъуналди ва куьредин таватрини кьелни фу гуналди, шад гьалара къаршиламишна.
Анал агьалийрин, къуллугъчийрин ва МФЦ-дин работникрин вилик тебрикдин хуш келимаяр гваз сифте муниципальный райондин Кьил Абдулуматлибов Нариман Шамсудинович рахана.
Атанвай мугьманар тебрик авунихъ галаз санал, райондин Кьили куьруь са вахтунда ихьтин гуьзел ва герек тир дарамат эцигна кардик кутунай вичин ва гьакIни вири районэгьлийрин тIварцIихъай республикадин руководстводиз, талукь министерствойрин регьберриз, дарамат эцигайбуруз чухсагъул лагьана, агьалийрин къуллугъар авунихъ галаз санал, налогар кIватIунин кардани еке куьмек жедайди къейдна.
Тебрикдин гафарихъ галаз санал атанвай багьа мугьманри агьалийриз къулайвал яратмишун патал райцентрдилай и дарамат эцигдай чил чара авунай, ам кардик акатун, ана кIвалахдай савадлу пешекарар гьазурун патал вири жуьредин куьмекар гунай райондин руководстводиз чухсагъул лагьана, МФЦ-дин коллективдихъ кIвалахда еке агалкьунар хьун кIанзавайди, чеб гьамиша герек тир куьмекар гуз гьазур тирди къейдна.
Абуру гьакI МФЦ-да 18 касдиз кIвалахдай чкаяр жедайди ва агьалийриз жуьреба-жуьре рекьерай 250 далай виниз къуллугъар ийидай мумкинвал авайдини къейдна. Анал чухсагъулдин гафар гваз МФЦ-дин директор А. М. Шагьмирзоевани рахана.
МФЦ ачухунин лишан яз яру лент атIунин гьуьрметдин кIвалах атанвай мугьманар тир Ю. М. Малламегьамедовал, О. Х. Хасбулатовал ва райондин Кьил Н. Ш. Абдулмуталибовал ихтибарна. Абуруни и гьуьрметдин кIвалах, чпин куьмекни галаз, чи гележег тир гъвечIи балайрив кьиле тухуз туна.
Гуьгъуьнлай и шадвилин мярекатдин иштиракчияр МФЦ-дин пешекаррихъ, абурун кIвалахдин шартIарихъ ва мумкинвилерихъ галаз мукьувай таниш хьана. Абур ана кIвалах тешкилнавай гьалдилай чина разивилин хъвер аваз са-сад гьаятдиз экъечIна.
Дараматдин вилик квай гъвечIи майдандал абур милли парталар алай жегьил гадайрини рушари устадвилелди тамамарай «Тебрикдин Лезгинка» кьуьл багъишуналди къаршиламшна.
И лишанлу вакъиадин гьуьрметдай анал райондин культурадин Дворецдин гьевескар артистри гъвечIи концертни гана. Адан программадик Дагъустандин лайихлу артист, машгьур манидар Омар Меликова, и мярекат кьиле тухвай машгьур тамада Ярагьмед Ярагьмедова тамамарай лезги халкьдин манияр, гьакIни гьевескар артистар тир Тофик Мегьамедова, Азим Ризаева ва масабуру лагьай манияр квай.
