«Сулейман-Стальский район» муниципальный районда терроризмдиз акси комиссия (АТК) кардик кваз гзаф йисар я. Ада, гьакIни чкадин самоуправленидин, къайдаяр хуьдай ва гуьзчивал тухудай органри, общественный тешкилатри, халкьдин куьмекни галаз, терроризмдин ва экстремизмдин вилик пад кьун патал тайин кIвалах тухузва. ЯтIани, и рекьяй хъувуна кIанзавай кIвалахрин кьадарни тIимил туш.
айондин администрациядин, талукь маса къуллугърин жавабдар работникрин иштираквални аваз эхиримжи вахтара хуьрера жемятрин собранияр кьиле тухузва, маса серенжемар кьабулзава. Терроризмдиз ва экстремизмдиз аксивал къалурзавай совещанияр ва собранияр райондин администрацияда, Вини СтIалдал, Цмурдал, НуьцIуьгъа, Курхуьрел ва маса хуьрера кьиле фена.
Алатай гьафтеда Кьулан СтIалрин хуьре кьиле фейи жемятдин собраниени терроризм лугьудай тIегъуьндин вилик пад кьунин месэладиз талукьарнавайди тир.
Адан кIвалахда муниципальный райондин Кьил Нариман Абдулмуталибова, райондин администрациядин Кьилин сад лагьай заместитель Лацис Оруджева, райондин общественный Палатадин председатель Алимет Мейланова, РФ-дин ФСБ-дин, МВД-дин районда авай отделрин кьилин пешекарри, теклифнавай маса юлдашри иштиракна.
Собрание ачухуналди, «село Орта-Стал» хуьруьн поселенидин кьил Муслим Альдерова мярекат тухунин метлебдикай, эхиримжи вахтара хуьре арадал атанвай къизгъин гьаларикай гегьеншдиз суьгьбетна.
- Чи хуьр виликдай гьам Куьреда, гьам республикада анжах хъсан патахъай тIвар акъатнавай, машгьур хьанвай хуьр тир, - лагьана М. Альдерова. – Эхиримжи вахтара хьайи чIуру кIвалахри чи хуьрел, адан агьалийрал беябурчивал гъана. ЧIуру патахъай къе чи хуьруьн тIвар республикадилай яргъарани акъатнава.
Собранидал МВД-дин Сулейман-Стальский районда авай ОВД-дин старший оперуполномоченный Максим Къараханова гъайи делилар виридак къалабулух, секинсузвал кутадайбур хьана. ИкI, ада къейд авурвал, алай вахтунда терроризмдиз майилвал авунвай райондин агьалийрикай 214 кас къайдаяр хуьдай органрин учетда (абурукай 23 дишегьлияр я), 9 кас федеральный ва международный розыскда ава, районда эхиримжи вахтара терроризмдихъ галаз алакъалу 3 дуьшуьш хьана.
Виридак секинсузвал кутазвай месэладай собранидал Кьулан СтIалрин хуьруьн агъсакъалрин Советдин председатель Абдулмежид Межидов, хуьруьн Собранидин депутат Мингьажидин Мегьамедов, и хуьруьнвияр тир Халилбег Халилбегов, Анвар Абдусамадов, Замир Ибрагьимов, МВД-дин ветеран АбдулнетIиф Пирисмаилов, гьакIни райондин администрациядин Кьилин сад лагьай заместитель Лацис Оруджев, общественный Палатадин председатель Алимет Мейланов, райондин имамрин Советдин председателдин заместитель Гьасан гьажи Амаханов ва маса юлдашар рахана. Абуру эхиримжи вахтара Сулейман-Стальский ва Кьурагь районрин сергьятра терроризмдинни экстремизмдин гьерекатриз акси яз КТО малумардай чкадал атун, гьакIни Кьулан СтIалрин хуьре хьайи дуьшуьш пислемишна, чпи гзаф маса инсанри терроризмни экстремизм лянетламишзавайди къейдна. Рахайбуру ихьтин чIуру гьерекатрин вилик пад кьун патал къайдаяр хуьдай ва чкадин самоуправленидин органри, талукь маса къуллугъри кIвалах гужлу авун, къуватар сад авун лазим тирди къейдна.
Муниципальный райондин Кьил Нариман Шамсудинович Абдулмуталибова вичин рахунар кIватI хьанвай вирибуруз азиз Рамазандин варз мубарак авунилай башламишна.
- Гьуьрметлу хуьруьнвияр! – лагьана Н. Ш. Абдулмуталибова. – Азиз Рамазандин варз кьетIенди я, ада халкьарин арада меслятвал мягькем хьуниз, чи обществода сад-садан гъавурда акьуниз, гьар са касдиз анжах хъсан крар авуниз, регьимлу хьуниз эвер гузва. Амма къе чун и хуьре маса месэладин – терроризмдихъ галаз женг чIугунин патахъай кIватI хьанва, вични кьвед лагьай сеферда. Килиг садра къе чаз вуч крар аквазватIа: мусурманди мусурман яна рекьизва, душманри гайи пулунихъ. Къе чи райондин, Кьулан СтIалрин хуьруьн тIвар федеральный телеканалрай кьазва, хъсан патахъай ваъ, террориствилин гьерекатар кьиле физва лугьуз. За квез ачухдиз лугьун: Россия виликди физва, ам девлетлу ва къуватлу жезва. И кар адан душманриз хуш туш. Гьавиляй абур чи общество гуьнгуьникай хкудиз, террориствилин гьерекатар тухуз алахъзава. Пулар гуз ихьтин чIуру крар ийизвайбуруз и кар иливдач. Законриз акси акъвазун, гъиле яракь кьуна гьукуматдиз акси хьун – ибур тахсиркарвилер я. И кардизни рехъ гудайди туш.
Хуьрел, райондал беябурчивал атунал зун рази туш, и кардал хуьруьнвияр, районэгьлиярни рази хьана кIандач. Чи халкь законлу, бине авай халкь я. ЧIуру кIвалахривай садни къерехда акъвазна кIандач. Терроризмдиз лянет гъуналди, чна адан вилик пад кьун патал къуватар сад авун лазим я.
Терроризмдиз ва экстремизмдиз акси тухузвай ва хъувуна кIанзавай кIвалахрал хьиз, Нариман Шамсудинович Абдулмуталибов районда экономикадин, социальный, эцигунрин, агьалияр кIвалахдалди таъминарунин, федеральный ва республиканский программаяр, инвестиционный проектар уьмуьрдиз кечирмишунин рекьерай тухузвай кIвалахрал, хьанвай хъсан нетижайрални гегьеншдиз акъвазна.
Райондин Кьилин метлеблу рахунрихъ яб акалайла Кьулан СтIалдал хьайи собранидин иштиракчияр фикирдал атана хьи, терроризм негь авуна, хийирдин крарал-кIвалахрал машгъул хьун кьилди гьар са кас ва санлай район, общество патал менфятлу я.