«Сулейман-Стальский район» муниципальный райондин Кьил Нариман Шамсудинович Абдулмуталибов, жавабдар къуллугъчиярни галаз, хуьрериз, организацийриз, карханайриз фин, анра кIвалахар тешкилнавай гьаларихъ галаз мукьувай таниш хьун хъсан адетдиз элкъвенва.
ИкI, алатай гьафтеда райондин гьакимар «Сулейман-Стальская районная центральная больница» государстводин бюджетдин карханада ва Кьулан СтIалрин аялрин бахчада хьана. Кьилди къачуртIа, райондин центральный больницада Нариман Шамсудинович Абдулмуталибов ва адахъ галай райондин администрациядин Кьилин сад лагьай заместитель Лацис Оруджев, капитальный эцигунрин управленидин начальник Низами Асланов ва маса ксар дараматда капитальныйдаказ ремонтрин кIвалахар кьиле тухузвай гьалдихъ галаз таниш хьана. ЦРБ-дин кьилин духтур Максим Ханбалаева, адан заместитель Гьабибуллагь Гьабибуллаева лагьайвал, больницадин ва поликлиникадин дараматар капитальныйдаказ ремонт авун патал «Модернизация здравоохранения» федеральный программадай 35 миллион манат пул ахъайнава. Ремонтрин кIвалахар республикадин «Агрострой» ООО-дин махсус бригадади кьиле тухузва.
Н. Ш. Абдулмуталибов, адахъ галай жавабдар къуллугъчияр, ЦРБ-дин кьилин пешекарар ремонтрин кIвалахар тухузвай больницадин ва поликлиникадин дараматрин дегьлизра, кабинетра хьана. Тамамарзавай кIвалахрилай абур рази яз амукьна.
ЦРБ-дин кьилин духтур Максим Ханбалаева лагьайвал, ремонтрин кIвалахар тухузва лагьана больницада ва поликлиникада агьалияр кьабулунин, абурун сагъламвал ахтармишунин рекьерай четинвилер, татугайвилер авач. И кар патал ремонтрин кIвалахар тухун тийизвай отделенийра кабинетар чара авунва.
Райондин Кьил духтуррихъ, абурун патав атанвай инсанрихъ, палатайра къатканвай азарлуйрихъ галазни мукьувай таниш хьана, абурун кIвалахрикай, дерди-гьалдикай хабарар кьуна. Агьалийри ремонтрин кIвалахар тухунилай, гьакIни духтуррин кIвалахдилай разивал къалурна.
«Агрострой» ООО-дин пешекарри райондин гьакимар ЦРБ-да ва поликлиникада ремонтрин вири кIвалахар вахтунда ва ери аваз акьалтIардайдахъ инанмишарна.
Кьулан СтIалрин аялрин бахчадиз фидайла Нариман Шамсудинович Абдулмуталибовахъ райадминистрациядин Кьилин 1-заместитель Лацис Оруджев, райондин общественный Палатадин председатель Алимет Мейланов, информационный агентстводин начальник Жабраил Асланов, хуьруьн поселенидин кьил Муслим Альдеров, гьакIни чкадин СМИ-дин векилар галай.
Сифте нубатда Н. Ш. Абдулмуталибов бахчадин вилик квай, хъсандиз безетмишнавай, михьивал ва къайда авай багъда бицIекрихъ галаз гуьруьшмиш хьана. Абуру хуралай кIелай шиирри, лагьай манийри, гьа бицIекриз хас тир къайдада абуру авур куьруь ихтилатри Нариман Шамсудиновичан ва адахъ галай къуллугъчийрин гуьгьуьлар хкажна.
-Куь сивел гьамиша ихьтин хъвер, мецел шад манийрин келимаяр хьурай, гьуьрметлу балаяр! – алхишдин къайдада лагьана Н. Ш. Абдулмуталибова.
Н. Ш. Абдулумуталибов аялрин бахчадин кIвалериз, дегьлизриз, бицIекар къугъвазвай, ксузвай чкайриз тамашна. Анра авай къайдайрилай, санлай бахчада кIвалах тешкилнавай гьалдилай ам рази яз амукьна.
Аялрин бахчадин заведующий Ифриз Бабаевади лагьайвал, бахчада 2 группа кардик ква, анра 55 аял ава, 16 кас пешекарри кIвалахзава.
-Чахъ алава са группа кардик кутан хъийидай ва 15 аял кьабул хъийидай мумкинвал ава, - давамарна И. Бабаевади.
Н. Ш. Абдулмуталибова и кардин тереф хвена ва алава группа кардик кутун патал райондин администрация куьмек гуз гьазур тирди къейдна.
Текст кхьейди ва шикилар ягъайди Хазран Кьасумов я.
