Терроризм арадал атуни инсанрин кьиникьар, яшайишдин шарт1ар, руьгьдин ва медениятдиин девлетар квадарун арадал гъизва. Терроризмдиз акси дяве ч1угун ва ислягь инсанриз зиян гун тавун патал, обществодин хатасузвал хуьн патал еке къуватар желб авуниз мажбур хьанва.
Чи район гьамиша ислягь, мугьманрал рик1 алай, гьамишаллугъ инсанриз къулай шарт1ар тешкилдай, къал-макъалдик экеч1 тийидай ва вири хъсан патарихъай чешнеллу районрикай сад я. А ислягьвал ва халкьдин архайинвал хуьн патал чна вири къуватар эцигун чарасуз герек я.
Т1имил вахт вилик Кьурагь райондин сергьятда вири дуьньядин халкьари негь ийизвай террористри са мешебегидин чандал гьужум авуна ва ва ам кьена. Са акьван вахтни фенвач, мад чи райондин Нуьц1уьгърин хуьруьн патав гвай тама и ч1уру инсанри ягъунар арадал гъанва ва и чуьруькри райондиз яракьлу къуватар желб авунва.
Террористар чеб ислягь инсанрин арада яшамиш жез, законар хуьдай органривай кьат1ун тахьун патал алахъзава. Ихьтин инсанрихъ галаз женг ч1угун патал гьамиша виридан мукъаятвал лазим я.
Гьар са малум хьайи ч1уру к1валах тади гьалда раиж авун, таниш тушир инсан вуч кас ят1а чирун, шаклу к1валахрикай хуьрерин кьилер ва къайда хуьдай органар хабардар авун, хуьрера пайда жезвай чи халкьдиз хас тушир диндин ва маса къайдаяр ва абурун гуьгъуьна авай инсанар вирида негь авун ва абурухъ галаз женг ч1угун гьар са агьалидин кьилин везифа хьана к1анда. Терроризмдихъ ва экстремизмдихъ галаз алакъалу хьана хуьрера арадал атанвай вакъиаяр кимерал ва гьар са хизанда лянет авуна к1анда. Гьар са районэгьлиди ва чи райондиз къвезвай мугьманри сифтени-сифте гьукуматдин къанунрал амал авун лазим я. Гьукуматда ва обществода тестикь хьанвай къанунар ч1уруниз садани рехъ гудач.
Вири агьалийривай мукъаятвал артухарун, вири инсанриз кьет1ен фикир гун, шаклу автотранспортдин ва шейэрин лишанар рик1ел хуьн, шаклу инсанрин чинин к1алубар, парталар, т1варар, рахунрин ва чеб тухузвай къайдаяр фикирда кьун ва Сулейман-Стальский райондин ОВД-диз, участковый инспектордиз ва хуьруьн кьилиз хабар гун т1алабзава.
Экстремизмдизни тероризмдиз рехъ тагунин нетижа акун патал законар хуьнар органри, гьар са хуьруьн кьили, миск1инрин имамри, общественный ва жегьилрин тешкилатри, гьуьрметлу инсанри, вири диде-бубайри ачухдаказ дурум гана женг ч1угун лазим я.
Ша чна вирида гъил-гъиле аваз экстремизм ва терроризм чи райондин сергьятдай терг ийин.
Райондин Антитеррористический комиссия
