25-майдиз «Сулейман-Стальский район» муниципальный тешкилатдин администрациядин нубатдин заседание кьиле фена. Адан кIвалахда райондин администрациядин управленийрин, отделрин, къуллугърин руководителри, хуьрерин поселенийрин кьилери, теклифнавай маса юлдашри иштиракна.
Анал алай месэладикай лугьуналди, заседание муниципальный райондин Кьил Имам Музамудинович Яралиева ачухна ва кьиле тухвана.
Заседанидал «2008-йисуз ва 2009-йисан 1-кварталда агьалийрилай райондин муниципальный тешкилатдиз ва администрациядиз атай арзайрин гьакъиндай» месэладиз килигна.
- Заз заседанидал алай месэладив эгечIдалди, ихьтин са кардал акъвазиз кIанзава, – лагьана Имам Музамудиновича. – Малум тирвал, 19-майдиз Агъа СтIалдал Дагъустандин халкьдин шаир, ХХ асирдин Гомер СтIал Сулейманан 140 йисан юбилейдиз талукьарнавай шадвилер кьиле фена. Ам лап кьилин дережада тешкиллувал аваз, халкьди активвилелди иштиракуналди, кьиле тухвана. Гьа идалди райондин агьалийри чпи СтIал Сулейманан руьгьдиз лап екез гьуьрмет ийизвайди, адан тIварцIин ва яратмишунрин зурбавал дериндай аннамишзавайди къалурна. Махачкъаладай атай республикадин руководителар, маса шегьеррайни районрай атай мугьманар районэгьлийрилай рази яз амукьна. Гьавиляй заз райондин руководстводин, кьилди жуван патай СтIал Сулейманан юбилейдин мярекат тешкилуник ва кьиле тухуник пай кутур вири организацийриз, райондин вири районэгьлийриз рикIин сидкьидай чухсагъул лугьуз кIанзава.
Заседанидал алай «2008-йисуз ва 2009-йисан 1-кварталда агьалийрилай райондин муниципальный тешкилатдиз ва администрациядиз атай арзайрин гьакъиндай» месэладай райондин администрациядин крар идара ийизвайди тир Мирзамет Къарибович Наджафова информация авуна. Ада къейд авурвал, шаз ва алай йисан 1-кварталда «Сулейман-Стальский район» муниципальный тешкилатдин Кьил Имам Музамудинович Яралиеван ва райондин администрациядин Кьил Штибег Гьажимегьамедович Мегьамедханован тIварцIихъ агьалийрилай 805 чар-арза атана. Саки гьа кьадар хурун арзаярни хьана. Россиядин Федерациядин ва Дагъустан Республикадин талукь законрихъ галаз кьадайвал, райондин руководство, талукь маса къуллугъар агьалийрин арзайриз килигзава, талукь серенжемар кьабулзава.
Лагьана кIанда хьи, давамарна докладчиди, райондин МО-диз ва администрациядиз атай арзайрин 32 процент чилерин месэлайрихъ галаз алакъалубур я. Абурулай гъейри, здравоохраненидин, образованидин, социальный ва маса месэлайрайни арзаяр атанва.
Идахъ галаз сад хьиз, райондин агьалийрилай Дагъустан Республикадин, федеральный органриз физвай арзайрин кьадар 2-3 сеферда тIимил хьанва. Ида чи халкьди районда аваданламишунин, экономикадин, социальный рекьерай хъсанвилихъди жезвай дегишвилерин, райондин руководстводи тухузвай политикадин тереф хуьзвайди къалурзава.
Гьа са вахтунда, М. Къ. Наджафова къейд авурвал, райондин руководстводал къвезвай арзайрин кьадар тIимилардай мумкинвилерни авачиз туш. ИкI, мисал яз, хуьрерин поселенийрин кьилери хуьруьн агьалияр дигидай целди таъминарзавач. Нетижада инсанри арза райондин руководителриз кхьизва. ИкI тахьун патал хуьрерин поселенийрин кьилер, талукь маса къуллугъар сифте нубатда агьалийрин къайгъуйра хьана кIанда.
Райондин МО-диз, администрациядиз агьалийрилай атай арзайриз дериндай анализ гузвайдакай, ахтармишун ва талукь серенжемар кьабулун патал абур талукь къуллугърал рекье твазвайдакай лугьунихъ галаз санал, докладчиди и рекьяй амай кимивилерал, гьялиз тахьанвай месэлайрални акъвазна.
Заседанидал гьялзавай месэладикай рахадайла Имам Музамудинович Яралиева къейд авурвал, агьалийрилай райондиз къвезвай арзайрихъ галаз кIвалах тухуниз кьетIен фикир гун лазим я. Гьич са арзани фикир тагана, законри истемишзавай ва абурухъ галаз кьадайвал талукь серенжемар кьабул тавуна тун лазим туш. И рекьяй кIвалах хъсанардай рекьерни ава. Абурални И. М. Яралиев гегьеншдиз акъвазна.
Заседанидал И. М. Яралиев районда рекьерин къерехра, хуьрера михьивилер авунин ва хуьнин месэладални акъвазна. Ада къейд авурвал, эхиримжи вахтара санитариядин рекьяй районда еке кIвалах тухванва. Гьа са вахтунда, вири организацийра, хуьрера и месэладиз истемишзавай къайдада фикир гузвач. Администрацияди талукь къарар акъуднаватIани, бязи хуьрера михьивилер ийизвач, субботникар тешкилзавач.
Михьивилерин рекьяйни И. М. Яралиева гьар са организациядин, хуьрерин поселенийрин кьилерин вилик тайин везифаяр эцигна.
Заседанидал са бязи маса месэлайризни килигна.
