Герейханован хуьре кардик квай 2-нумрадин ДЮСШ-ди (директор Гь. Гьадисов) Цмуррин хуьре боксдай филиал ачухна 7-йис я. Алай вахтунда ана тежрибалу тренер, спортдин мастервиле кандидат Шамил Алибегован гъилик 25 жаванди боксдай вердишвилер къачузва ва чпин устадвал хкажзава.
Мукьвара филиалда вердишвилер къачузвай Мурад Мегьамедова Белиж поселокда Дагъустан Республикадин Кьиблепатан зонадин кIвенкIвечивал патал 2001-2002-йисара дидедиз хьайи жаванрин арада тухвай акъажунра иштиракна ва 32 килограммдин заланвиляй 1-чка кьуна.
Тренер Ш. Алибегова чаз лагьайвал, гила Мурада Дагъустан Республикадин кIвенкIвечивал патал кьиле тухудай акъажунра иштиракда.
Чаз малум хьайивал, М. Мегьамедов Дагъустандин Огни шегьерда кьиле фейи Дербент райондин кIвенкIвечивал патал хьайи ачух акъажунрин гъалибчини я.
Лагьана кIанда, Шамил Алибегован маса ученикрихъни республиканский ва чIехи маса турниррани агалкьунар жезва. ИкI, Мурад Абумислимов 3 сеферда республикадин кIвен-кIвечивал патал тухвай акъажунрин чемпион, Кеферпатан Кавказдин федеральный округдин 3-призер, Россиядин кIвенкIвечи-вал патал тухвай акъажунрин иштиракчи, Мегьамед Мегьамедов ва Мегьамедшафи Мирзоев ДР-дин кIвенкIвечивал патал тухвай акъажунрин призерар я.
- Чи спортсменар республикада ва адалай яргъара кьиле тухузвай турнирриз финин карда райондин спортдин ва физкультурадин отделдин начальник Надир Эфендиева еке куьмекар гузва, - лугьузва тренер Шамил Алибегова. – Идай спортсменри адаз чухсагъул лугьузва. Ихьтин къайгъударвили тренеррин ва спортсменрин гуьгьуьлар хкажзава.
