Вичихъ еке ва баркаллу тарих авай Хутаргърин хуьряй (1966-йисуз хуьруьн жемят Аламишедиз куьч хьана) Ватандин ЧIехи дяведин йисара фронтдиз 88 кас фенай. Абурукай 44 кас ватандин азадвал патал кьиле фейи женгера игитвилелди телеф хьана. Женгера къалурай жуьрэтлувилерай ТIаиб Агьмедов Ватандин ЧIехи дяведин 1 ва 2-дережайрин, Яру Гъетрен, Баркалладин 3-дережадин орденриз, 11 медалдиз лайихлу хьанай. Гьукуматдин наградайриз маса хутаргъвиярни лайихлу хьана.
Абурукай сад Нурдин Шерифов тир. Ада фронтдай вичин диде-бубадиз хейлин чарар рахкурнай. Абурукай са чар 1945-йисан 28-январдиз райондин «Колхоздин пайдах» газетдизни акъатнай. Чарче кхьенва: «Играми дах Шериф ва диде Гуьлпери! Сифтедай за квез саламар рекье твазва. Гьуьрметлу диде! Зун Красная Армиядин лап хъсан связистрикай сад я. За и кар михьивилелди кьиле тухвана. За 12 фашист тергна, заз «За отвагу» медаль ганва. Зун гила мад 2 наградадик кутунва. Зи къаст душман тамамдиз терг авуналди баркалла къазанмишун я. Куьне колхозда галат тахьана зегьмет чIугу ва фронтдиз куьмекар це.
Куьн сагърай, вири хуьруьнвийриз саламар лагь. Зун куь хва Нурдин».
За фронтдай чар кхьей Н. Шерифован кьадар-кьисметдикайни делилар кIватIна. Малум хьайивал, Берлинда женгинин рехъ куьтягь хьайи ва гъалибвал къачуна хайи хуьруьз хтай Н. Шерифова са шумуд йисуз Хутаргърин колхоздин председателвиле ва районда жуьреба-жуьре къуллугърал кIвалахна. Гуьгъуьнлай ада Кьасумхуьрел кIвал-югъ кутуна, гьана яшамиш хьана.
Н. Шерифов чидайбуру рикIел хкизвайвал, рагьметлуди гьахъвал гвай, кьакьан, ацIай буй-бухах авай, къуват квай итим тир.
Хазран Кьасумов