Вахт санал акъвазнавач, тIебиатдин къанун тирвал, ада гьамиша виликди еримишзава. Ингье, Ватандин ЧIехи дяведа чи халкьди, Яру Армияди фашистрин Германиядин винел гъалибвал къачурдалай инихъ саки 70 йис алатнава. ЯтIани Гъалибвал къачуник пай кутур, аскерар-игитар, далу пата зегьмет чIугур кьегьалар несилрин рикIелай алатзавач.
Йисар къвез мадни фида, кьегьалрин тIварар эбеди яз рикIера амукьда. Лугьудайвал, игитар рекьидайди туш, абур мидаим я.
Мукьвара «Сулейман-Стальский район» муниципальный райондин Кьил Нариман Шамсудинович Абдулмуталибова шад гьалара Кьасумхуьрелай ва ЦIийи поселокдай тир далу патан 13 зегьметчидив «1941-1945-йисарин Ватандин ЧIехи дяведа Гъалибвилин 70 йис» юбилейдин медалар вахкана. Россиядин Федерациядин Президент Владимир Владимирович Путинан тIварунихъай наградаяр вахкуналди ва депутатрин Собранидин райондин администрациядин, ва кьилди вичин патай медалар мубарак авуналди, Н. Ш. Абдулмуталибова къейд авурвал, юбилейдин медалар гун – им фронтда, гьамни далу пата игитвилелди, гьакъисагъвилелди Гъалибвилин югъ мукьва авурбурун зурба кьегьалвилиз дериндай гьуьрмет авунин лишан я. Са шумуд йикъан вилик Гъалибвилин 70 йисан юбилейдин медаль Агъа СтIалрин хуьряй тир Ватандин ЧIехи дяведин иштиракчи, гзаф орденринни медалрин сагьиб, гвардиядин майор Гьажимегьамед Къазимегьамедовавни вахканай.
Гьуьрмет авунин лишан яз агъадихъ Н. Ш. Абдулмуталибова Гъалибвилин юбилейдин медалар вахкай далу патан зегьметчийрин тIварарни кьаз кIанзава: Мегьамедтагьир Аликберов, Амахан Амаханов, Кумсият Атемова, Играмудин Ибрагьимов, Вагьидин Исмаилов, Мизамудин Мазанов, Зибиюллагь Мирзеханов, Мирзехан Мирзеханов, Мегьамеднасир Нежведилов, Верди Улугъаев, Гьасанбег Ферзилаев, Зулейхалум Дадашева ва Иминат Исмаилова.
Райондин администрациядай чаз лагьайвал, санлай къачурла, «1941-1945-йисарин Ватандин ЧIехи дяведа Гъалибвилин 70 йис» юбилейдин медалар райондай далу патан зегьметчияр хьайи 460 касдив вахкуда.
Дяведин йисарин далу патан зегьметчийрикай рахадайла , ихьтин алавани ийиз кIанзава. Эхь, дяведин йисара Яру Армиядин далудихъ зегьметчи халкь хьана. Душман Кавказдин шегьерриз, хуьрериз гьахьайла, Дагъустандин, кьилди къачуртIа, Кьиблепатан Дагъустандин халкьарни Терек, Сулак вацIарин ва Дербент шегьердин къваларив фашистрин кьушунриз акси сенгерар туькIуьру-нив эгечIнай. И кIвалахар кьиле тухуз Кьасумхуьруьн райондайни 3000-дав агакьна инсанар фенай. Анриз яцар, арабаяр, балкIанар рекье тунай. Махачкъаладин оборонадин комитетдин къарардалди партиядин Кьасумхуьруьн райкомдин секретарь К. Беделов ва тешкиллувилинни инструкторский отделдин заведующий М. Къафланов далу пата зегьмет чIугвазвай 7 ва 8 лагьай батальонрин комиссарарвиле тайинарнай. ХъуьтIуьн варцара, къайи ятара, кIвачер, гъилер, чинар къайи тухванатIани, азарлу хьанатIани, дагъвийри чпин вилик эцигай тапшуругъар еридив, вахтундилай вилик кьилиз акъудна.
Маджалисдин мулкуна сенгерар туькIуьрдайла, кьасумхуьруьнвийри Абуталиб Абилован регьбервилик кваз зегьмет чIугуна. Гьакъисагъвилелди, четинвилериз дурум гуз зегьмет чIугур 738 районэгьлидиз «Кавказ хуьнай» медаль ганай.
Лагьана кIанда, Гъалибвилин 70 йисан юбилейдин медалар далу патан зегьметчийрив райондин администрациядин жавабдар работникри, къуллугърин руководителри ва хуьрерин поселенийрин кьилери вахкуда.
Хазран Кьасумов.
Шикилда: Н. Ш. Абдулмуталибова далу патан зегьметчийрив Гъалибвилин 70 йисан юбилейдин медалар вахкузвайла.