Са акьван къаяр-мекьер, живер авайди хьаначтIани, кьуьд акъатна, тIебиатдин гуьзел вахтарикай сад тир гатфарин «чархачи» мартдин варз атанва. Гатфарин ишигълу сифте йикъара чпиз хизандин ивирар, кIвалин къул хуьн, гьакIни гуьзелвални руьгьдин чимивал ва хъсан маса ерияр хас тир дишегьлийрин сувар къейд авун – имни тIебиатдин кьетIенвилерикай, лишанрикай сад я. Лугьуз жеда хьи, чи дидейриз, вахариз, кайванийриз ва рушариз – чаз виридалайни играми инсанриз гатфарни хъуьрезва.
Ингье, 6-мартдиз Кьасумхуьрел, райондин Россиядин халкьарин адетдин культурадин Центрадин гъвечIи залда, Виридуьньядин дишегьлийрин йикъаз талукьарнавай шадвилин мярекат-межлисни тешкиллувилелди, инсанрин активвал аваз кьиле фена. АкI жезва хьи, шаир Рамазан Каитова лагьайвал, «Зи Куьре гур демерава, Рахазва саз агалкьунрин».
Гьеле пакаман кьиляй Центрадай язавай шад авазарни манияр кьуд патаз чкIизва, абуру йикъан гуьзелвилиз шериквалзава. Мярекат башламишдалди хейлин вахт амайтIани, залда ширинлухарни жуьреба-жуьре няметар, сокар эцигнавай столрихъ инсанри (абурун чIехи пай дишегьлияр я) чкаяр кьунва. Залдин кьилелай «Сувар мубаракрай, играми дишегьлияр!» гафар кхьенва, цларал 8-мартдин сувариз талукьарнавай плакатар, шикилар алкIурнава. Дагъустан Республикадин культурадин лайихлу работник Къазибег Къурбанова регьбервал гузвай райондин аялрин музыкальный школада кардик квай халкьдин алатрин оркестрди язавай авазри мярекатдиз атанвай инсанрин гуьгьуьлар шадарзава.
Сятдин 12 тамам жедайла залдиз муниципальный райондин Кьил Нариман Шамсудинович Абдулмуталибов кьиле аваз райондин администрациядин жавабдар работникар, районда кардик квай къуллугъринни общественный тешкилатрин руководителар атана.
Виридуьньядин дишегьлийрин йикъаз талукьарнавай шадвилин мярекат ачухунин сифте гаф муниипальный райондин Кьил Нариман Шамсудинович Абдулмуталибов рахана.
-Чи играми дидеяр, вахар, рушар ва мярекатдин иштиракчияр! – лагьана Н. Ш. Абдулмуталибова. – Сифтени-сифте за квез виридаз Виридуьньядин дишегьлийрин сувар райондин депутатрин Собранидин, администрациядин ва кьилди жуван патай рикIин сидкьидай мубаракзава. Чи дишегьлийриз гьамиша рикIин михьивал, руьгьдин чимивал, камаллувал, регьимлувал хас хьайиди я, дишегьлиди дуьньядиз пайгарвал, мергьеметлувал, лап хъсан гележегдихъ умудлувал гъизва. Чи вири хъсан крар, къени ниятар «Диде» гафунихъ галаз алакъалу я. Дидейриз, инсаниятдин гуьзел пай тир дишегьлийриз, чна гьамиша гьуьрмет ийизва. Уьлкве, республика ва район вилик финик, обществода жезвай дегишвилерик, хъсан вири кIвалахрик дишегьлийрин еке пай ква. Образованида, здравоохраненида, культурада, экономикада – обществодин вири хилера агалкьунар къазанмишуналди дишегьлийри хушбахт гележег, генгвал мукьва ийизва. Гьавиляй заз вири дишегьлийрихъ мягькем сагъламвал, кIвалера бахт-берекат, веледрикай рикIин динжвал хьун кIанзава!
Н. Ш. Абдулмуталибован куьруь, амма гзаф метлеблу рахунрилай гуьгъуьниз музыкальный школадин халкьдин алатрин оркестрдихъ галаз анин муаллим Расул Абдулкибирова «Кхьихь мани, Асеф Мегьман» мани тамамарна.
Межлис-мярекат бажарагълу культработник ва тамада Ярагьмед Ярагьмедова, вичиз адет хьанвайвал, еке устадвилелди кьиле тухвана.
Виридуьньядин дишегьлийрин йикъан суварин мярекатдал тебрикдин хуш келимаяр гваз «сельсовет Цмурский» хуьруьн поселенидин кьил Раида Алибегова, райондин образованидин отделдин начальник Индира Османова, культурадин отделдин начальник Майрудин Бабаханов, «Хуьруьн майишатдин ва суьрсетдин управление» казенный карханадин руководитель Мегьамедзагьид Бабаев, СССР-дин Верховный Советдин депутат хьайи Абидат Рагьимханова, райондин агьалийриз яшайишдин жигьетдай къуллугъдай управленидин отделдин начальник Шамсият Магьмудова ва маса юлдашар рахана.
Трибунадихъ мад сеферда муниципальный райондин Кьил Нариман Шамсудинович Абдулмуталибов атана.
-Гьуьрметлу юлдашар, мярекатдин иштиракчияр! – лагьана Н. Ш. Абдулмуталибова. – ЦIинин йис Ватандин тарихда кьетIен йис я, чна Гъалибвилин 70 йис тамам хьун къейд ийизва. Идахъ галаз алакъалу яз РФ-дин Президент В. В. Путинан Указдалди дяведин иштиракчийрив ва далу патан зегьметчийрив Гъалибвилин 70 йисан юбилейдин медалар вахкузва. И кар патал чна къенин межлисдиз далу патан зегьметчияр тир 10 дишегьлидиз теклифнава, Владимир Владимирович Путинан тIварунихъай медалар вахкунал зун шад я ва за квез виридаз и лишанлу вакъиа мубаракни ийизва.
Н. Ш. Абдулмуталибова гурлу капарик кваз далу патан зегьметчийрив «1941-1945-йисарин Ватандин ЧIехи дяведа Гъалибвилин 70 йис» юбилейдин медалар, гьакIни алай кIелунин йисуз районда ва республикада тухвай конкурсра гъалиб хьайи муаллимар тир дишегьлийрив Гьуьрметдин грамотаяр вахкана.
Лагьана кIанда, гьар са касдин рахунрилай гуьгъуьниз Дагъустан Республикадин лайихлу артист Омар Меликова, Азим Ризаева, Магьизар Алиевади, Селимат Гьажиевади, Эрзиман Османова, Тофик Мегьамедова, Керим Камилова, Ярагьмед Ярагьмедова манияр лагьана, межлис гурлу авуна.
Мярекатдал лотереядин билетар къугъвана, гьакIни «Дишегьлиди итимдилай шикаятдин шиир кхьин», «Халкьдин манияр кIелун», «Хъуьруьнрин кимел» конкурсар тухвана.
Виридуьньядин дишегьлийрин суварин иштиракчийри авур кьуьлери, лагьай манийри мярекат мадни гурлу авуна.
Текст кхьейди ва шикилар ягъайди Х. Кьасумов я.
