И йикъара КIварчагърин хуьруьвай 3 километрдин яргъа, «Купул ятар» тIвар алай тIула, тама цIай кьуна куз башламишна.
Хабар хьайи хуьруьнви, поселенидин кьилин пешекар Закирбегов Гьажибала кьиле аваз хуьруьнвияр Селимов Верзантан «Газ-53» маркадин машиндаваз цIай кьуна кузвай тамухъди фена. Чкадал агакьай хуьруьнвийри, 10-15 метридин мензил амаз, тади гьалда кул-кус атIана, чиле авай пешер михьна, ара ачухна. ИкI цIай яваш хьана, тамухъ абуру цIай ахъайнач. 3-сятина чIугур зегьметди там цIукай хвена.
Ф. Наврузова, А. Къурбанова, А. Абдулвагьабова, Ш. Абасова, Ш. Абдуллаева, К. Велиханова, М. Ибрагьимова, В. Селимова ва мешебеги С. Пирмегьамедова цIай хкадарун патал акьалтIай зегьмет чIугуна.
Наврузов Зейнуллагь, зегьметдин ветеран