Тамар уьлкведин, халкьдин девлет я. Чи республикадани агъзур гектарралди тамар ава. Республикада тамарин майишатдин рекьяй Комитет кардик ква, тамар лесничествойриз пайнава. Алай йисан сифте кьилера Комитетда кьиле фейи тамухъанрин заседанидал, хъсандиз кIвалахзавай лесничествойрикай яз «Касумкентское лесничество» государстводин казенный учрежденидин (ГКУ-дин) тIварни кьуна. Ида чак, лесничестводин пешекаррик, ашкъи-гьевесни кутуна.
Лагьана кIанда, лесничествода тамар хуьнин, адан майданар артухарунин ва маса рекьерай тайин кIвалах тухузва. Алай вахтунда, лагьайтIа, вилик акъвазнавай асул везифайрикай сад тамар цIукай хуьникай ибарат я. Гатфар, гад-ибур цIаяр кьунин хаталувал арадал гъизвай, гьаваяр чими жезвай вахтар я. ЦIай кьунин чIуру кIвалахар тахьун патал чна кIвалах тухузва, и рекьерай «2015-йисалди тамар цIаяр кьуникай хуьн» тIвар алай республикадин тайин метлебдин программадин ва «Дагъустандин лесопожарный центр» ГАУ-дин истемишунрал амал ийизва. Идалайни гъейри, чи пешекарри хуьрерин агьалийрихъ галаз гъавурда тунин кIвалахни тухузва, хуьрерин поселенийра гуьгьуьллу куьмекчийрин дестеяр тешкилнава.
ЯтIани мукъаятвал квадарна виже къведач. Гьаваяр чими хьайила, гзафбур ял ягъиз тIебиатдал фидай адет я. Какатай чкайрал цIай хъувуна кIандач. ЦIай хъувуртIа, инсанар хъфидайла ам хкадарун чарасуз я.
Чна винидихъ лагьайвал, тамар чи девлет я, ада чаз сагъламвал гузва.
Ша чун тамарив къадирлудаказ эгечIин!
Али Алиев, «Касумкентское лесничество» ГКУ-дин лесничийдин куьмекчи