Уьмуьр-бегьерлуди, яшайиш-берекатлуди

Заз вич фадлай хъсандиз таниш тир, яшар 80 йисав агакьзавай кьасумхуьруьнви Велимет Керимов садра хкягъай кеспидиз вафалувал къалурай, хиве тур везифаяр намуслувилелди кьилиз акъудай, уьмуьр лайихлудаказ кечирмишзавай инсанрин жергедик акатзава.
Секин къилихрин, кьил рехи хьанвай, сабурлу, камаллу инсан тир Велимет халу гьар сеферда Кьасумхуьруьн майдандал ва я рекье-куьчеда гьалтайла, зи рикIел Майрудин Бабаханован шиирдин цIарар къведа:
Регъуь жемир кIусни рехи
                               кьилихъай
Ам акьулдин лишан я.
Эгер вунни рехи ятIа
                            Шалбуз хьиз
Вунни, гьам кьван, кьакьан я.
Вичин уьмуьрдин пеше хьайи шофервиликай, чилив къадирлувилелди эгечIуникай, уьмуьрдин игьтияж тир зегьметдикай, хийирлу крарикай В. Керимов ашкъидивди рахада. Вич заз мукьувай хъсандиз таниш тир 20-25-йисан къене и кас заз садрани наразивилин, масадан намусдик хкIадай, шел-хвалдин гафар рахана ван хьайиди туш.
В. Керимоваз зегьметдин дад, чилин къадир фад чир хьана, гьеле жаван яз.
- Нисиналди школада жедай, нисинлай данайрив, калерив фидай, диде-бубадиз колхоздин чуьлдин кIвалахра куьмекар гудай, - лугьузва къе вичин уьмуьрдин жаван йисар рикIел хкиз зегьметдин ветеранди.
Гьа йисара хуьрера механизаторвилин кеспи лап герекбуруз элкъвенвай. Трактордин, автомашиндин, комбайндин рулдихъ ацукьна зегьмет чIугвазвай, хуьруьн майишат вилик тухузвай, рехъ-хвал туькIуьрзавай ксариз хуьрера еке гьуьрметни авай.
- Райондин военкоматдай направление гана, за 1955-йисуз шофервилин курсар куьтягьна, - давамарзава ихтилат В. Керимова. – Адалай гуьгъуьниз за зи рикI алай шофервилин пешедиз саки 40 йис бахш авуна.
Витебск шегьерда армиядин жергейра къуллугъдайла В. Керимова 3 йисуз частунин командирдин машиндал шофервал авуна. Армиядай хтай жегьилди и кеспи райондин заготскотда давамна.
1964-йисуз Кьасумхуьруьн «Рычал-су» заводдин директор М. Ш. Шабанова техникадал ва зегьметдал рикI алай Велиметаз и карханадиз кIвалахал атун теклифна. Имни дуьшуьшдин кар тушир: гьа йисара карханада акъудзавай продукциядин чIехи пай Советрин Союздин яргъал шегьерриз рекье твазвай. Гьавиляй парар дашмишун патал хъсан пешекарар-шоферар герекзавай.
В. Керимова и заводдихъ галаз 27 йисуз вичин кьисмет алакъалу авуна. И йисара ада «ЗИС», «ЗИЛ», «Прага» машинрал кIвалахна. Заводдиз цIийиз хкай «КАМАЗ» машинни Велиметал ихтибарна. «Рычал-су» заводдин продукция дашмишиз ада Москва, Тула, Казань, Тольятти, Краснодар, Баку, Ростов ва яргъал маса шегьеррин рекьер-мензилар са шумудра атIана, гьанрай заводдиз ва райондин маса организацийризни карханайриз герек шейэр хкана.
Гьакъисагъвилелди кIвалах авунихъ галаз санал, В. Керимова заводдин ва райондин общественный уьмуьрдани активвилелди иштиракна. ИкI, 16 йисуз адакай заводдин партийный организациядин секретарь, кьве сеферда райсоветдин ва са шумудра Кьасумхуьруьн Советдин депутат, райондин партконференцийрин делегат хьана.
Производстводин кIвенкIвечи хьайи В. Керимоваз 1972-йисуз райондин исполкомдин ва 1981-йисуз РСФСР-дин недай ва хъвадай шейэрин министерстводин патай «Жигули» маркадин машинар гана.
Саки 40 йисуз производствода шофервиле кIвалах авур, 30 йисуз вичин шикил райондин Гьуьрметдин доскада хьайи Велимет Керимован гьакъисагъ зегьмет гьакIни Зегьметдин Баркалладин 3-дережадин орден, Октябрдин Революциядин  90 йисан, «Зегьметдин ветеран» медалар, 20-дав агакьна грамотаяр, «Коммунистический зегьметдин зарбачи», «Соцсоревнованида гъалиб хьайиди» знакар, гзаф кьадар къиметлу пишкешар гуналди къейдна.
Лугьуз жеда хьи, В. Керимов уьмуьрдин баркаллу рехъ фена, и рехъ ада давамни ийизва. Са рахунни алачиз, Велимет халу хьтин инсанри чпин гьакъисагъ зегьметдалди, инсанвилин ерийралди, ацукьунин-къарагъунин дуьзгуьн къанажагъдалди амайбуруз чешне къалурзава, уьмуьр бегьерлуди, яшайиш берекатлуди ийизва.
 

Хазран Кьасумов