24-мартдиз «Сулейман-Стальский район» муниципальный районда кардик квай межведомственный комиссиядин заседание хьана. Адан кIвалахда и комиссиядин членри, Росреестрдин, Кадастровый къуллугъдин, БТИ-дин, администрациядин жавабдар работникри, хуьрерин поселенийрин кьилери, теклифнавай маса юлдашри иштиракна.
Заседание муниципальный райондин Кьил, межведомственный комиссиядин (МВК-дин) председатель Нариман Шамсудинович Абдулмуталибова ачухна ва кьиле тухвана.
Заседанидал агъадихъ галай месэлайриз килигна:
1. Межведомственный комиссияди 2013-йисуз налогар кIватIунин мумкинвилер артухарунин кIвалахдин гьакъиндай гьахъ-гьисаб.
2. Маршрутдин ва инсанар тухузвай таксийрин иесияр налогдин учетда акъвазунин гьакъиндай.
3. 2013-йисуз налогар кIватIунин рекьяй хуьрерин поселенийра тухвай кIвалахдин гьакъиндай.
Заседанидал алай месэлайрай межведомственный комиссиядин секретарь Саният Вагьабовади гегьенш рахунар авуна. Ада къейд авурвал, муниципальный райондин Кьил Нариман Шамсудинович Абдулмуталибован регьбервилик кваз межведомственный комиссияди 2013-йисалай эгечIна тестикьарнавай пландихъ галаз кьадайвал кIвалахзава. И девирда комиссиядин 12 заседание, налогар кIватIунин месэладиз талукьарна хуьрерин поселенийрин кьилерихъ, райондин предпринимателрихъ галаз са шумуд заседание тухвана, гьар гьафтеда и месэладай совещанийрал хуьрерин поселенийрин кьилерин гьахъ-гьисабрихъ яб акална. Тухвай кIвалахдин нетижа яз районди вири рекьерай налогар кIватIунай ва налогрилай къецяй тир къазанжияр къачунай планар артухни алаз кьилиз акъудна.
Вичин рахунра докладчи налогар кIватIунин рекьяй хьанвай хъсан нетижаяр къалурзавай рекъемрал, мисалрал, тафаватлу хьайи хуьрерин поселенийрал, гьакIни ишлемиш тавунвай мумкинвилерални гегьеншдиз акъвазна.
И месэладай заседанидал муниципальный райондин администрациядин Кьил Штибег Мегьамедханов, адан заместителар тир Лацис Оруджев, Савин Велиев, Рамазан Абдулазизов, «сельсовет Новомакинский», «село Эминхюр», «сельсовет Герейхановский», «сельсовет Карчагский» поселенийрин кьилер тир А.Къазиагьмедов, Р.Рамазанов, И.Мирзаметов, А.Сефибегов, РОВД-дин начальникдин заместитель Бейдулагь Ягъибегов, Росреестрдин, Кадастровый къуллугъдин, налогрин инспекциядин, БТИ-дин векилар рахана.
Заседанидин нетижаяр кьун яз рахай Нариман Шамсудинович Абдулмуталибова, санлай межведомственный комиссияди тухвай кIвалахдилай разивал къалурна, идахъ галаз санал, районда кIватIзавай налогрин кьадар артухардай мадни мумкинвилер авайди къейдна, и рекьяй кIвалах хъсанардай рекьер къалурна, меслятар, теклифар гана.
