Гагь-гагь акI жеда хьи, алай йисуз вич тешкил хьайидалай инихъ 85 йис тамам жезвай, машгьур са шумуд касдин юбилеяр къейд ийизвай СтIал Сулейманан районда гьар са югъ лишанлу вакъиайрив, шад мярекатрив, цIийивилерив ацIанва. Гьакъикъатдани гьакI я.
Ингье, 7-мартдиз райондин центрадал алай Ибадуллагь Тагьирован тIварунихъ галай культурадин Дворецдин чIехи залда Виридуьньядин дишегьлийрин йикъаз талукьарнавай шадвилин чIехи мярекат кьиле фена. Ана муниципальный райондин Кьил Нариман Шамсудинович Абдулмуталибов кьиле аваз райондин администрациядин жавабдар работникри, районда кардик квай къуллугъринни общественный тешкилатрин, организацийринни карханайрин руководителрини векилри, зегьметдин ветеранар тир ва алай вахтунда районда жуьреба-жуьре хилера гьакъисагъвилелди зегьмет чIугвазвай дишегьлийри, теклифнавай маса юлдашри иштиракна.
Сиви-сивди инсанрив ацIанвай залдин сегьне, кьилелай «Сувар мубаракрай, играми дишегьлияр!» гафар кхьена, райондин сергьятдал эцигнавай СтIал Сулейманан паркунин шикилдалди, цуькверивди, гьар жуьре рангарин экверивди безетмишнава.
Далдамчийрин дестеди халкьдин туьнт авазар тамамарайдалай ва Эрзиман Османова «Райондин гимн» мани (чIалар Лейла Османовадин, гьава Майина Абдулмуталибовадин) устадвилелди лагьайдалай гуьгъуьниз, сегьнедин перде ачухна.
Шадвилин мярекат машгьур культработник ва тамада Ярагьмед Ярагьмедова кьиле тухвана.
Виридуьньядин дишегьлийрин сувариз талукьарнавай мярекат ачухунин сифте гаф муниципальный райондин Кьил Нариман Шамсудинович Абдулмуталибов рахана.
- Чи гьуьрметлу дидеяр, вахар ва рушар! – лагьана Н. Ш. Абдулмуталибова. – Сифте нубатда за квез райондин депутатрин Собранидин, администрациядин ва кьилди жуван патай къенин гуьзел сувар мубаракзава. Гьамиша эдеблувал, камаллувал, зегьметдал рикI хьун хас хьайиди я дишегьлийриз. Гьакъикъатдани, куьн хзандин къул хуьзвайбур, гуьрчегвилин, мегьрибанвилин ва сирлувилин лишан я. Женнет дишегьлийрин кIвачерик ква, лугьузва мисалда. Инсаниятдин гуьзел пай тир дишегьлийриз чна гьамиша гьуьрмет ийизва. Хзанар кутунин, аялар тербияламишунин, абуруз яшамиш жез, зегьмет чIугваз ва гъалиб жез чирунин везифаяр кьиле тухунихъ галаз санал, куьне, гьуьрметлу дишегьлияр, общество, район вилик тухуникни еке пай кутазва. Куь виридан кIвалера бахт-берекат, гьуьрмет-хатур, веледрикайни рикI динж хьурай!
Нариман Шамсудинович Абдулмуталибова мярекатдал райондин жуьреба-жуьре хилера гьакъисагъвилелди зегьмет чIугур дишегьлияр-ветеранар тир Аземат Агъамирзоевадив, Ханпери Мегьамедкеримовадив, Маисат Селимовадив, Тамум Меликовадив, Мислимат Алияровадив, Лейла Мейлановадив, Нелла Гьажихановадив, Маржанат Оружевадив муниципальный райондин администрациядин Гьуьрметдин грамотаяр вахкана.
Дагъустан Республикадин Кьил Рамазан Гьажимурадович Абдулатипован, республикадин Гьукуматдин ва Халкьдин Собранидин патай ДР-дин Халкьдин Собранидин депутат, академик Гьамидуллагь Исмаилович Мегьамедова Виридуьньядин дишегьлийрин сувар мубаракна, тебрикдин, алхишдин келимаяр лагьана.
Лагьана кIанда, мярекат гьар са касдин тебрикдин рахунрилай гуьгъуьниз гьевескарри манияр лугьунин, кьуьлер авунин къайдада кьиле фена.
Мярекатдал рахай райондин образованидин управленидин начальник Жабраил Асланова, УСЗН-дин начальник Жавидин Бремова, райондин агъсакъалрин Советдин председатель Фахрудин Османова, РФ-дин лайихлу артист Абдулагь Гьабибова, ДР-дин лайихлу артистка Зарифа Къухмазовади, ЦРБ-дин кьилин духтурдин заместитель Мегьамед Фаталиева чи дидеяр, вахар, рушар, сусар тир дишегьли гафуна багъривилин, кIанивилин, хушвилин, гьейранвилин гьиссер, лишанар, рангар авайди къейдна, абуруз алхишдин келимаяр лагьана.
Гьар са касдин рахунрилай гуьгъуьниз ДР-дин лайихлу артистар тир Фаризат Зейналовади, Омар Меликова, гьевескарар Сейранат Тажибовади, Фархад Абдурагьманова, Нариман Асланова, Ярагьмед Ярагьмедова, Кьасумхуьруьн 2-нумрадин СОШ-дин 4-классдин ученица Эмина Мисримановади, Кьулан СтIалрин СОШ-дин ученик Агьмед Тагьирова, Вини СтIалрин СОШ-дин рушарин ва райондин школайрин муаллимрин хордин коллективри манияр лагьана, музыкальный школадин ученик Навруз Омарова чуьнгуьрдай авазар тамамарна, «Куьре» ансамблди кьуьлер авуна, Виридуьньядин дишегьлийрин суварин мярекат мадни гурлу авуна.
Текст кхьейди Хазран Кьасумов я
