Алай йисан 22-январдиз «Сулейман-Стальский район» муниципальный районда кардик квай терроризмдиз акси комиссиядин нубатдинди тушир заседание кьиле фена.
Ам мукьвара Дагъустан Республикадин терроризмдиз акси комиссиядин республикадин Хатасузвилин советдин саналди тир заседание кьиле финихъ ва АгъастIалрин хуьре гъили туькIуьрнавай хъиткьиндай шей хатасуз авунихъ галаз алакъалу яз эвер ганвайди тир. Заседание, и ва терроризмдиз акси комиссиядин вилик акъвазнавай месэлайрикай куьрелди лугьуналди, муниципальный райондин Кьил, районда кардик квай терроризмдиз акси комиссиядин председатель Нариман Шамсудинович Абдулмуталибова ачухна ва кьиле тухвана.
Райондин администрациядин кьилин пешекарри, комиссиядин членри, къайдаяр хуьдай органрин руководителри, хуьрерин поселенийрин кьилери, общественный организацийрин, диндин идарайрин ва СМИ-рин векилри иштиракай заседанидал администрациядин Кьилин заместитель Савин Велиева районда авай гьаларикай, терроризмдин ва экстремизмдин вилик пад кьун патал тухузвай, гьакIни и рекьяй хъувуна кIанзавай кIвалахрикай информация авуна. Ада къейд авурвал, районда терроризмдин, чIуру кIвалахринни гьерекатрин вилик пад кьун патал комиссияди ва адан рабочий группади тайин кIвалах тухузва, районда гьалар хъсанарунин, пайгардик кутунин мураддалди диндин идарайрихъ ва векилрихъ галаз кIвалах тухудай общественно-консультативный Совет тешкилнава, эвер гун кьабулна.
Гьа са вахтунда Савин Велиев, гьакIни заседанидал рахай МВД-дин районда авай отделдин начальник Абдуллагь Мирзеханов, ФСБ-дин 4-отделдин начальникдин заместитель Арсен Вагьабов, райондин имам Рамазан Рустамов, Общественный советдин председатель Алимет Мейланов, агъсакъалрин Советдин председатель Фахрудин Османов, райондин алимрин Советдин член Даир Гъаниев районда эхиримжи вахтара хьайи чIуру кIвалахрал, бедбахтвилин дуьшуьшрални гьерекатрал гегьеншдиз акъвазна. Законрихъ галаз, дагъвийрин намусдив, къилихдив кьан тийизвай чIуру кIвалахри, гьерекатри, кьилди къачуртIа, райондай са бязи жегьилри Сирияда кьиле физвай женгера иштиракуни, террориствилин гьерекатар авуни, гъиле яракь кьуни ва ихьтин маса крари инсанрик секинсузвал, къурху кутазва, санлай районда гьалар къизгъинарзава. Мисал яз, мукьвал йикъара Агъа-стIалрин хуьре ФСБ-дин къуллугъчийри хъиткьинардай шей хатасуз авуна. Районда гьалар къайдадик кваз хуьн, террориствилин ва чIуру маса кIвалахринни гьерекатрин вилик пад кьун патал властдин къурулушри, къайдаяр хуьдай органри, общественности къуватар сад авун чарасуз я.
Гьа са вахтунда, заседанидал рахайбуру эхиримжи вахтара Волгоград шегьерда, Махачкъалада ва республикадин маса шегьеррани районра хьайи чIуру кIвалахрикай, террориствилин гьерекатрикайни лагьана, абур пислемишна, негь авуна.
Заседанидин нетижаяр кьуналди, Нариман Шамсудинович Абдулмуталибова районда арадал атанвай гьалариз ва кьиле физвай вакъиайриз дериндай къимет гана, террориствилин ва экстремизмдин, чIуру кIвалахринни гьерекатрин вилик пад кьун патал талукь къуллугърин вилик тайин ва кьетIи везифаяр эцигна.
