Чи республикадин вири чкайра хьиз, 21-январдиз чи райондин администрациядин заседанийрин залда Дагъустан АССР арадал атайдалай инихъ 93 йис тамам хьуниз талукьарна тухузвай тарихдинни культурадин просвещенидин Йикъан сергьятра аваз «Дагъустан: государственность къачун ва республикадин алай аям» (Россиядин Президент В. В. Путина РФ-дин Федеральный Собранидиз ва Дагъустан Республикадин Кьил Р. Гь. Абдулатипова Дагъустан Республикадин Халкьдин Собранидиз ракъурай Чарарин бинедаллаз) повесткадик кваз райондин активдин собрание кьиле фена.
Активдин собранида райондин Собранидин ва хуьрерин поселенийрин депутатри, хуьрерин поселенийрин кьилери, райондин карханайрин, организацийрин, идарайрин руководителри, образованидин, здравоохраненидин, культурадин, аграрный сектордин, общественный ва жегьилрин организацийрин, диндин векилри иштиракна.
Райондин активдин собрание, ана иштирак ийиз республикадай атанвай багьа мугьманар тебрик авуналди, анал алай месэладай куьруь гаф рахуналди, муниципальный райондин Кьил Абдулмуталибов Нариман Шамсудиновича ачухна.
Анал алай месэладай гегьенш информацияр ва чпин фикирар гваз Дагъустан Республикадин Халкьдин Собранидин депутат, А. Тахо-Годидин тIварунихъ галай педагогикадин илимдинни ахтармишунрин институтдин директор, академик Мегьамедов Гьамидуллагь Исмаилович ва алакъадинни телекоммуникацийрин рекьяй ДР-дин министрдин заместитель Маламегьамедов Юсуп Мегьамедович рахана.
Гуьгъуьнлай анал гьялзавай месэлайрай чпин фикирар ва теклифар гваз ва чпи тухузвай кIвалахдикай райондин Общественный советдин председатель Мейланов Алимет, АгъастIалкъазмайрин юкьван школадин директордин заместитель Ханвердиева Венера, райондин центральный больницадин духтур Садулаева Имара, райадминистрациядин культурадин отделдин начальникдин заместитель Султанов Жабир, «Сад тир Россия» ВПП-дин чкадин отделенидин исполкомдин председатель Ширинов Баламет рахана.
Абуру РФ-дин Президент В. В. Путина Федеральный Собранидиз ва ДР-дин Кьил Р. Гь. Абдулатипова Дагъустандин Халкьдин Собранидиз ракъурнавай Чарара къарагъарнавай месэлаяр важиблубур ва алай вахтунихъ галаз сихдаказ алакъалубур тирди, абурукай гьар сада, программный документрикай хьиз, менфят къачун герек тирди къейдна ва абурулай чпин разивал къалурна.
Эхирдай анал рахай муниципальный райондин Кьил Нариман Шамсудинович Абдулмуталибова район гележегда экономикадин, социальный ва маса рекьерай вилик тухун патал инвесторрин ва кьилдин карчийрин куьмекни галаз авунвай кIвалахрикай, вилик акъвазнавай месэлайрикай лагьана, са бязи теклифар гъана, метлеблу докладрай ДР-дин Президентдин администрациядин ва Гьукуматдин патай векилвилер гваз атанвай мугьманриз чухсагъул лагьана.
Райондин активдин собранидин иштиракчийри анал талукь къарар кьабулна.
