Са тIимил вахт вилик, Зизикрин хуьре командировкада авайла, вичихъ галаз фадлай дуствилин алакъаяр авай муаллим Мегьамедов Илмудин Пашаевичанни зи арада уьмуьрдикай, кIвалахдикай, инсандин бахтлувиликай ихтилат кватнай.
- Ваз вуч аватIа чидани, дуст кас, зун уьмуьрдилай, обществода кьиле физвай вакъиайрилай са артух наразивал ийиз кIандай инсан туш,- лагьанай И.П.Мегьамедова. -Идалай алава яз, за зун бахтлу инсан язни гьисабзава. Вуна фикир ийимир хьи, захъ девлетар, хазинаяр ава лагьана. Пул, мал-девлет гзаф аваз хьайитIани, инсандивай вич бахтлу кас яз гьисабиз жедач, гьисабиз хьайитIани, им ягъалмишвал я.
- Я стха, бес ви бахтлувал квекай ибарат я?-са артух фикир-хиял тавуна, суал гун хьанай завай.
- Зи фикирдалди, бахтлу хьун патал инсандиз герекзавайди пуд затI-пуд шартI я: сагъламвал, туькIвей хзан ва рикI алай пешедин иеси хьун,- жаваб ганай Илмудин муаллимди.- Аллагьдиз шукур, захъ абур авазва, гьавиляй за зун бахтлу инсан язни гьисабзава.
Гьа вахтунда за и ихтилатдиз са артух фикир ганачир. Ихтилат зи рикIел мукьвара хуьруьн школадиз фейила, са шумуд муаллимди Илмудин Пашаевичакай газетдиз макъала кхьин тIалабайла, хтана. Гьа икI зун мад сеферда И.Мегьамедовахъ галаз адан уьмуьрдин ва зегьметдин рекьикай, хзандикай суьгьбет авуниз мажбур хъхьана.
Малум хьайивал, И.Мегьамедов 1954-йисуз дидедиз хьана. Сифте классдилай башламишна, ада школада анжах хъсан ва лап хъсан къиметар аваз кIелна, школадин общественный уьмуьрда активвилелди иштиракна.
- Гьеле школада кIелзамаз зун муаллимвилин пешедални ашукь хьанай,- лугьузва Илмудин Пашаевича.
Вичин рикIе авай мурад кьилиз акъудун патал И.П.Мегьамедов 1972-йисуз В.И.Ленинан тIва-рунихъ галай Дагъустандин государственный университетдин химиядинни биологиядин факультетдик экечIна. Вичин зегьметдин рехъ жегьил пешекарди 1977-йисуз хайи хуьруьн юкьван школада муаллимвиле кIвалах авунилай башламишна. Гьа сифтедилай Илмудин Пашаевича вич хъсан чирвилер авай, пешедал ва аялрал рикI алай, тешкиллувилин кIвалах алакьдай муаллим яз къалурна. Идалайни гъейри, ада вичин зегьметдалди, хуш къилихдалди гьам муаллимринни школьникрин, гьам аялрин диде-бубайрин патай гьуьрмет ва авторитет къазанмишна. Гьа и ерийриз килигна школадин муаллимри И.Мегьамедоваз еке ихтибар авуна - 1990- йисуз ам кIелунин рекьяй школадин директордин заместителвиле тайинарна. Эхиримжи йисара школадихъ кIелунин ва тербиядин рекьерай хъсан нетижаяр хьун, школьникри райондин ва республикадин олимпиадайра кIвенкIвечи чкаяр кьун-ибур, гьелбетда, Илмудин Пашаевичан чирвилерихъ, чалишмишвилерихъ, кIвалахдихъ галаз тIимил алакъалу туш.
-За чирвилер гайи гзаф гадайрикайни рушарикай чIехи дережайрин руководителар, хъсан пешекарар, кьилинди, обществодиз менфятлу инсанар хкатнава, са шумуда чи школада муаллимар яз кIвалахзава, абурал за дамахни ийизва,- лугьузва И.Мегьамедова.
Тежрибалу, кIвалахда агалкьунар авай муаллим хьиз, И.Мегьамедов хуьре-кIвале гьуьрмет авай хзандин кьилни я. Мегьрибан дишегьли тир адан уьмуьрдин юлдаш Гуьлшеди хуьруьн библиотекадин заведущийвиле кIвалахиз 31 йис я. Аквазвайвал, абуру кьведани баркаллу кIвалах ийизва: Илмудина акьалтзавай несил савадлувилин рекьел акъудзава, Гуьлшеди агьалийриз руьгьдин жигьетдай къуллугъзава.
Илмудин Пашаевичаз рикIин шадвал, руьгьдин таъминвал, хзандин бахтлувал гузвай шартIарикай сад, ада вичи лугьузвайвал, ферли веледар хьун я. Адан 4 веледдини кьилин образование къачунва, кIвал-хзан хьана, жуьреба-жуьре чкайра чпин пешейрай кIвалахзава.
Илмудин Пашаевичаз, адан марифатлу хзандиз жемятдин арада лайихлу гьуьрмет ва авторитетни ава.
Хазран Кьасумов
