ЧIурузвай, къайдадик квачир, чиркинзавай я чка, я шей-затI хъсан аквадач, я ахьтин чкайриз килигизни кIан жедач.
Герейханован хуьруьн 1 ва 2-отделенийрин арада авай, шегьре рекьин къерехдив гвай къавахдин чIехи тар, мадни дуьз лугьун хьайитIа, адал атанвай гьал акурла (шикилда) гуьгьуьл шад жедани кьван? Ваъ, гьелбетда. ЧIехи са хел хана, ам тарцин пунухъай куьрс хьана заз сифте яз алатай йисан октябрдин вацра акунай. Ингье, адалай инихъ пуд варз алатнава, тар, лугьудайвал, «лув хайи верч хьиз» хайи хел куьрс хьана ама.
Вучиз хайи хел атIана, вахчузвач? Дугъри я, чи гзаф хуьрера, гьабурукай яз Герейханован хуьруьн отделенийрани пичера кIарасар кузмач, гзафбуру фуни кваз газ акалнавай хьрара чразва. Гьич тахьайтIа, ханвай хел патав гвай багълар кIевирнавай жугъуниз хьайитIани ишлемишиз жедачни?
Белки газетдиз и макъала ва шикил акъатайла кьванни таран ханвай хел атIана вахчудай кас жагъин. Чна и кардик кIевелай умуд кутазва.
Хазран Кьасумов