2013-йисуз хуьрерин поселенийрин музейрин арада тухвай Вирироссиядин конкурсда Алкьвадрин хуьре кардик квай Гьасан эфендидин музей 1-чкадиз лайихлу хьана. Музей Дагъустан Республикадин культурадин министерстводин «Культурадин муниципальный лап хъсан учреждение» Дипломдиз, пулдин премиядиз лайихлу хьана.
Музейди республикадин культурадин ирс хуьнин, кьилди къачуртIа, Гуниб райондин Согратль хуьре авай региональный метлеб авай «Мавзолей Мухаммеда ал-Яраги» памятникдин кьисметдин гьакъиндай къайгъударвал ийизва. Кьилди къачуртIа, и мавзолейдин памятник реконструкция хъийидайла эцигунрин нормайриз, технический истемишунриз жаваб тагузвайди якъин хьайила, музейдин къуллугъчийри Кьасумхуьруьн ва Алкьвадрин хуьрерин агьалийрин тIварунихъай и къайдада памятникдал ремонтрин кIвалахар тухун акъвазарун тIалабзавай чар ДР-дин культурадин министерстводиз рекье туна.
Чарчиз жаваб яз хуьрерин агьалийриз республикадин культурадин министр З. Бутаевадин тIварунихъай Чухсагъулдин чар хтана. Ана кхьизвайвал, «… республикадин культурадин ирс хуьниз фикир гунай ва «Мавзолей Мухаммед ал-Яраги» памятникдин кьисметдин гьакъиндай къайгъударвал авунай музейдин директор Гьуьсейн Имамович Гьуьсейноваз ва Кьасумхуьруьнни Алкьвадрин агьалийриз ДР-дин культурадин министерстводи чухсагъул лугьузва… ДР-дин культурадин министерстводи культурадин ирс хуьнин объектрал ремонтринни реставрациядин кIвалахрин проектрин тереф эгер талукь проектрин организацияди памятникдин тарихдинни культурадин къиметлувал таъминариз хьайитIа хуьзвайди я».
Асият Мусаева