КIварчагъ дередиз гьахълудаказ къучагърин дере лугьузва. Эхиримжи йисара дередин КIварчагърин, Зизикрин, Нуь-цIуьгърин ва Экенрин хуьрерай хъсан спортсменар, кьилди къачуртIа, боксерарни акъатзава, абуру районда, республикада ва адалай къеце тухузвай турниррани чемпионатра кIвенкIвечи чкаяр кьазва.
Мукьвара КIварчагърин хуьре командировкада авайла, чун райондин 1-нумрадин ДЮСШ-ди (директор Сергей Мирзалиев) хуьре ачухнавай боксдин филиалдиз фена, ана жаван боксерар гьазурунин рекьяй кIвалах тешкилнавай гьалдихъ галаз таниш хьана.
Малум хьайивал, хуьре боксдин филиал 2001-йисуз ачухна. Сифте йикъалай инихъ ана тренервиле Россиядин Федерациядин спортдин мастервиле кандидат Альберт Межидова кIвалахзава. Эхиримжи йисара и филиалдикай Кьиблепатан Дагъустанда хъсан боксерар гьазурзавай центр хьанва лагьайтIа, чун ягъалмиш жедач. Хуьряй республикада ва адалай къеце тухвай акъажунра чемпионвилин тIварариз лайихлу хьайи, гьакIни приздин чкаяр кьур спортсменар-боксерар акъатна. Абурукай яз чавай 3 сеферда Дагъустан Республикадин кIвенкIвечивал патал тухвай акъажунрин, Пятигорск ва Астрахань шегьерра тухвай Вирироссиядин турниррин чемпион, СКФО-дин чемпионатдин 3-призер Имран Абдиеван, Россиядин кIвенкIвечивал патал тухвай акъажунрин чемпион Радик Наврузован, Дагъустан Республикадин чемпионар тир Мухамад Гьуьсейнован, Магьидин Амаханован, Фазил Эседулаеван, Фархад Межидован, республикадин кIвен-кIвечивал патал тухвай акъажунрин 2-призер Давид Агъаеван ва масабурун тIварар кьаз жеда.
Тренер Альберт Межидова чаз ихьтин са кардикайни лагьана. Филиалда боксдай вердишвилер къачур гзаф гадайри, уьлкведин маса регионра яшамиш жез, спортдин рехъ давамарзава. ИкI, Тверь шегьерда авай Рафик Наврузова мукьвара спортдин мастервилин дережа къачуна, Роберт Гьамидулаевакай Москвадин областдин чемпион хьана, Камал Межидова Сахалин шегьердин патай экъечIиз Вирироссиядин акъажунра агалкьунар къазанмишзава.
-Алай вахтунда зи гъилик кьве группада 26 жаванди боксдай чпин устадвал хкажзава,-давамарзава вичин суьгьбет Альберт Межидова.-Абурукайни гзафбурухъ тарифдин нетижаяр ава, агалкьунар жезва.
Тренерди чаз лагьайвал, КIварчагърин са шумуд жаван боксерди и йикъара 1998-1999 ва 2000-2001-йисара дидедиз хьайи жаванрин арада Мегьарамдхуьруьн райондин кIвенкIвечивал патал Советский хуьре кьиле фейи ачух чемпионатда иштиракна, чпин алакьунар къалурна. ИкI, Равил Гьасанов, Эйзудин Къурбанов, Саидсен Абдурагьманов, Агъариза Агъамегьамедов, Мадрид Загьирбегов, Давид Агъаев ва Имран Абдиев чпин заланвилин категорийрай 1-чкайриз лайихлу хьана, 4 касди 2-чкаяр кьуна.
-Чи халкьдин кьегьал хва Имам Музамудинович Яралиева КIварчагъа вичин патай спортдин чIехи комплекс эцигзава, - лугьузва А.Межидова.-Ам ишлемишиз вахкайла, чаз кIвалахдай мадни хъсан кутугай шартIарни, чи спортсменрихъ чIехи агалкьунарни жеда. Имам Музамудиновичаз дередин агьалийри аферин лугьузва.
КIварчагърин жаван боксерар республикада ва адалай къеце тухузвай турнирриз фидайла спонсорвилин куьмек гузвай «Сулейман-Стальский район» муниципальный райондин Кьил Нариман Шамсудинович Абдулмуталибован, «сельсовет Карчагский» хуьруьн поселенидин Кьил Асланбег Сефибегован, хуьруьнвияр тир Нуьсрет Агъамегьамедован, Замидин Акимован, Завидин Загьирбегован гьакъиндайни Альберт Межидова чаз разивилин, чухсагъулдин келимаяр лагьана.
Гьина кIвалахзаватIа, гьана агалкьунарни жеда, лугьузва мисалда. И кар КIварчагърин хуьре кардик квай боксдин филиалдин кIвалахди мад сеферда тестикьарзава.
Хазран Кьасумов
