Дагъдин гурлу вацIу хьиз, вахтуни гьамиша виликди еримишда. Гьа и кар себеб яз йисар къвез алатда: сад тарихдиз фида, муькуьда, ам эвезуналди, рехъ давамда. Са шумуд йикъан вилик иландин йис тир 2013-йис акъатна, балкIандин 2014-йис алукьна.
ЦIийи йисан суварин шадвилер вичихъ еке ва баркаллу тарих авай, бубайрин хъсан адетар хуьзвай, халис мугьманперес ва зегьметкеш агьалияр яшамиш жезвай къадим Куьреда-СтIал Сулейманан тIварунихъ галай районда хъсан тешкиллувал, агьалийрин активвал аваз кьиле фена. И макъалада заз Кьасумхуьрел кьиле фейи кьве мярекатдикай рахаз кIанзава.
2013-йисан 30-декабрь. Райондин И. Гь. Тагьирован тIварунихъ галай культурадин Дворецдин банкетрин залда ЦIийи йисан сувариз талукьарна «Вили огонек» кьиле фена. Аниз район патал лайихлувилер авай инсанриз, орденринни медалрин, лайихлу тIварарин сагьибриз, зегьметдин ветеранриз, райондин идарайринни организацийрин руководителриз, хуьрерин поселенийрин кьилериз, лайихлу маса ксариз теклифнавай. Кьиле «Сулейман-Стальский район» муниципальный райондин Кьил Нариман Шамсудинович Абдулмуталибов аваз «огонекда» райондин администрациядин жавабдар работникри, общественный тешкилатрин векилрини активвилелди иштиракна.
Суьрсетдин няметарни ширинлухар, хъвадай ятар, сокар эцигнавай, хъсандиз безетмишнавай столрихъ ацукьнавай «огонекдин» иштиракчийрин гуьгьуьлар культурадин Дворецдин музыкантри язавай авазри мадни хкажзавай.
Сятдин 12 тамам хьайила «Вили огонек» башламишна. Ам кьиле тухузвайди тир Ярагьмед Ярагьмедова теклифуналди, шадвилин мярекатдиз Аяз Буба (артист Закир Алискеров) ва Живед руш (Герейханован 1-нумрадин СОШ-дин 10-классдин ученица Зарема Алискерова) атана, абуру «огонекдин» иштиракчияр тебрикна.
«Вили огонек» ачухунин сифте гаф муниципальный райондин Кьил Нариман Шамсудинович Абдулмуталибов рахана.
-Гьуьрметлу юлдашар, райондин агьалияр! – лагьана Н. Ш. Абдулмуталибова. – Ингье, мад са, 2013-йис акъатна, ам тарихдиз фена. Санлай къачурла, йис район патал писди хьанач. Социально-экономический рекьерай район республикада 3-чкадиз лайихлу хьун и кардин шагьид я. Районди налогар кIватIунайни планар артухни алаз кьилиз акъудна. Чахъ агалкьунар мадни хьана. 20I3-йис образованидин, медцинадин ва маса хилера хъсандиз кIвалах авур йис яз гьисабиз жеда.
Юлдашар! Чи кьилин мурад халкьарин ислягьвал, бахтлувал я. И кар патал чна алукьзавай йисуз мадни менфятлувилелди зегьмет чIугуна кIанда. Заз алукьзавай йис ислягьвилин, бахтлувилин йис хьана кIанзава.
Районда хъсан крар, шад межлисар тIимил хьанач. Алукьзавай йисуз абурун кьадар мадни гзаф хьурай. Балайрикай куь рикIер шад хьана кIанзава заз.
Квез алукьзавай 2014-йис мубаракрай, гьуьрметлу районэгьлияр!
Нариман Шамсудинович Абдулмуталибован тебрикдилай гуьгъуьниз Дагъустан Республикадин лайихлу артист Тарлан Мамедова ЦIийи йис тебрикзавай мани тамамарна.
«Вили огонекдал» тебрикдин келимаяр гваз райондин образованидин управленидин начальникдин заместитель Къачабег Аминов, Эминхуьряй тир отставкада авай Яракьлу Къуватрин полковник Мавлудин Сефербегов, райондин общественный Советдин председатель Алимет Мейланов, райондин центральный больницадин духтур Гьабибулагь Гьабибулаев, Кьасумхуьрелай тир зегьметдин ветеран Велимет Керимов, Россиядин Федерациядин лайихлу артист Абдулкъадир Сайдумован уьмуьрдин юлдаш Якъут Сайдумова, шаирар тир Шагьабудин Шабатов, Сажидин Саидгьасанов рахана.
Гьар са касдин рахунрилай гуьгъуьниз ДР-дин лайихлу артист Омар Меликова, Дербентдай атанвай манидар Сейранат Наджафовади, гьевескарар тир Агъарагьим Агъарагьимова, Селимат ва Бесхалум Гьажиеври, Камил Камилова, Гуьлмет Ярметова ва масабуру манияр лагьана, культурадин Дворецдин патав гвай «Кюре» ансамблди кьуьлер авуна.
Шадвилин межлисдал Нариман Шамсудинович Абдулмуталибова 2013-йисуз кIвалахда, кIелуна, общественный уьмуьрда тафаватлу хьайи са шумуд касдив наградаяр, Гьуьрметдин грамотаяр вахкана.
Гьакъикъатдани, межлисдал шад легьзеяр гзаф хьана. ИкI, Нариман Шамсудинович Абдулмуталибова, администрациядин кьилин заместителар тир Савин Мирзоевич Велиева, Рамазан Абдулалимович Абдулазизова авур кьуьлери, райондин Общественный Советдин председатель Алимет Алиметович Мейланова тардал тамамарай лезги авазри межлисдин иштиракчийриз екез таъсирна. Санлай «огонек» кьиляй-кьилди кьуьлерин, шад сегьнейрин майдандиз элкъвена. Ида чи халкьдиз суварар тешкилиз, абур кьиле тухуз чидайдан гьакъиндай ачухдиз шагьидвал ийизва.
Межлисдал лотереядин билетар къугъунни кьиле фена. Билетар пулсуздаказ адан вири иштиракчийриз пайнавай. Гьар кьвед лагьай касдиз призар акъатна.
ДаркIушкъазмайрин Культурадин кIвалин гьевескарри «Урусатдин цуьк» тамашадай къалурай ва Агъарагьим Агъарагьимовани Маила Яхьяевади къалурай «Акъваз, къари, свас ахварай аватда» сегьнейрини мярекатдин иштиракчийриз таъсир авуна.
ЦIийи йисан суварин шадвилер 31-декабрдиз В. И. Ленинан тIварунихъ галай майдандал эцигнавай елкадин патав давам хьана. Анал гзаф кьадар инсанар кIватI хьуни им халкьдин виридалайни рикI алай суваррикай сад тирдан гьакъиндай шагьидвал ийизвай.
Инални сифтедай Аяз Бубади ва Живед руша кIватI хьанвайбуруз ЦIийи йисан сувар тебрикна.
Гуьгъуьнлай райондин музыкальный школадин, аялрин яратмишунрин КIвалин жегьил гьевескарри манияр лагьана, кьуьлер авуна, далдамчийрин дестеди туьнт авазар тамамарна.
Мярекатдин иштиракчияр ва тафаватлу хьайи жегьил гьевескарар Аяз Бубадин гъиляй ЦIийи йисан савкьватриз лайихлу хьана.
Алукьзавай йисуз Куьредин чилел шад мярекатар, межлисар мадни гзаф хьурай!
Хазран Кьасумов я
