26-декабрдиз райадминистрацияда райондин депутатрин Собранидин нубатдин заседание хьана. Адан кIвалахда муниципальный райондин Собранидин депутатри, райадминистрациядин жавабдар работникри, гьар структурайрин къуллугърин руководителри, хуьрерин поселенийрин кьилери, райондин общественностдин ва СМИ-рин векилри иштиракна.
Заседание муниципальный райондин Кьил – райондин депутатрин Собранидин Председатель Нариман Шамсудинович Абдулмуталибова ачухна ва кьиле тухвана. Анал са жерге важиблу месэлайриз килигна.
Заседанидал алай сад лагьай месэладай «2014-йис ва 2015-2016-йисарин планламишнавай девир патал «Сулейман-Стальский район» муниципальный райондин бюджетдин гьакъиндай» къарар тестикьарунин гьакъиндай анал рахай райадминистрациядин финансовый управленидин начальник Рагьимов Магеллана депутатар бюджетдик кутунвай дегишвилерихъ галаз танишарна. Ада къейд авурвал, муниципальный райондин бюджетдиз къвезвай налогри ва налогринбур тушир такьатри 84825,8 агъзур манат тешкилда. Чпи-чеб идара ийидай чкадин муниципалитетрин хсуси налогрин такьатрин кьадар артухарунин, абур интереслу авунин мураддалди физический лицойрин доходрилай къвезвай налогрин республикадин бюджетдиз вахкана кIанзавай кьадардикай алава яз муниципальный бюджетриз вахкун тайинарнава ва ада 49 процент тешкилда.
2014-йисуз бюджетдин доходрин асул чешме физический лицойрин (ксарин) доходрилай къвезвай налогар яз амукьда ва абуру 55 процент тешкилда.
2014-йис патал муниципальный райондин умуми расходрин кьадарди 657975,7 агъзур манат тешкилда.
«Устойчивое развитие сель-ских территорий Сулейман-Стальского района на 2014-2020 годы» муниципальный программадин гьакъиндай анал информация гваз райадминистрациядин УСХ-дин начальникдин заместитель Абдулкъафаров Гьамидин, «Противодействие коррупции в муниципальном районе «Сулейман-Стальский район» муниципальный программа тестикьарунин месэладай райадминистрациядин правовой отделдин начальникдин заместитель Ширинов Баламет рахана.
Заседанидал гьакI муниципальный райондин муниципальный бюджетдин школадилай вилик квай образованидин идарайрин жуьрейра тунвай дегишвилерин гьакъиндай информация гваз правовой отделдин начальник Мирзоев Мегьамед, депутатрин Собраниди 2013-йисан 29-апрелдиз 119-нумрадик кваз кьабулай «О размерах земельных участков, предоставляемых гражданам для строительства и обслуживания жилого дома и ведения личного подсобного хозяйства» къарардик дегишвилер кутунин гьакъиндай муниципальный эменнидин ва чилерикай менфят къачунин управленидин начальник Бабаев Рамазан рахана.
Райондин Собранидин депутатри, вирида сад хьиз сес гуналди, 2014-йис ва 2015-2016-йисарин планламишнавай девир патал райондин бюджет тестикьарна.
Заседанидал гьялай амай месэлайрайни талукь тир къарарар кьабулна. Абур чна агъадихъ гузва.