Малум тирвал, виликамаз туьк1уьрнавай план-графикдин бинедаллаз «Сулейман-Стальский район» муниципальный райондин хуьрерин поселенийра 2013-йисуз социально-экономический рекьерай тухвай к1валахдин нетижаяр кьуниз ва 2014-2015-йисара тухун лазим тир к1валахар тайинаруниз талукьарна сессияр кьиле физва.
Ихьтин мярекат «сельсовет Цмурский» хуьруьн поселенидани кьиле фена. Адан к1валахда муниципальный райондин администрациядин кьилин заместитель Савин велиева, администрациядин капитальный эцигунрин ва ЖКХ-дин управленидин начальник Низами Асланова, хуьруьн поселенидин Собранидин депутатри, хуьре кардик квай карханайрин руководителри, теклифнавай маса юлдашри иштиракна.
Сессиядал «Хуьруьн поселенида 2013-йисуз социально-экономический жигьетдай вилик финн патал тухванвай к1валахдикай ва и рекьерай 2014-2015-йисара вилик акъвазнавай везифайрин гьакъиндай» месэладай поселенидин кьил Раида Алибеговади гегьенш рахунар авуна. Ада къейд авурвал, алатай йис хуьрер аваданламишунин, агьалийрин дуланажагъдин ва яшайишдин шарт1ар хъсанарунин жигьетдай тайин нетижаяр къазанмишиз алакьайди хьана. Гьахъ-гьисабдин девирда бюджетди 2151856 манат тешкилна. 2012-йисав гекъигайла, алатай йисуз хсуси къазанжияр хейлин артух хьана ва 2013-йисуз хсуси къазанжийрай план 130 процентдин кьилиз акъудна.
2013-йисуз хуьруьн поселенидин депутатрин Собранидин 5 заседание эвер гана, анрал хуьрер аваданламишунин, агьалияр к1валахдалди таъминарунин, агьалийриз медицинадин, культурадин, образованидин ва маса хилерай къуллугъ авун хъсанарунин, санлай 14 месэладиз, гьак1ни агьалийрилай атай 30-дав агакьна чарариз, арзайриз килигна.
Гьахъ-гьисабдин девирда «Цмур-Ичин» рекьиз херхем вегьена, «Кьасумхуьр-Цмур-Качалхуьр» рехъ грейдердалди къайдадиз гъана, «Рычал» вац1ал муьгъ эцигна, Цмурдал Темирханован т1варунихъ галай ва Учительская куьчейра цин линия тухвана, куьгьне хьанвайбурун чкадал экверин 18 даях ак1урна, 600 метрда симер дегишарна, Качалхуьруьз ва Ичиниз газ тухунин, Качалхуьре муьгъ эцигунин к1валахар гъиле кьунва. Кьилди ксарин-спонсоррин куьмекдалди Цмурдал сурарал 120 метр яргъивал аваз цал эцигна.
Хуьруьн поселенидин экономикадин кар алай хел хуьруьн майишат я. Поселенидин сергьятда лежбервилинни фермервилин 1 майишат, «Качалкентский» СПК кардик ква, 3 касди арендаторар, 2 касди карчияр яз, 274 касди хуьруьн майишатдин хсуси майишатра зегьмет ч1угвазва.
Хуьрерин агьалияр, асул гьисабдай, малдарвилел, багъманчивилел, куьнуьчивилел машгъул жезва. Агьалийрихъ 495 мал, 677 лапаг, 1100-далай виниз к1валин къушар, 359 куьнуь ава.
2013-йтсуз агьалийри ЛПХ вилик тухун патал «Россельхозбанкдай» 500 агъзур манат пул кредит яз къачуна.
Хуьрера зегьметдиз къабил 326 кас ава. Абурукай 57 касди бюджетдин хилера, 60 касди «Рычал-су» завода, 15 касди контрактникар яз, 45 касди вахтадин къайдада к1валахзава.
Цмуррин умуми образованидин, Качалхуьруьн бинедин ва Ичинрин сифтегьан школайра 129 аялди к1елзава, 46 муаллимди к1валахзава.
Алатай йисуз социально-экономический рекьерай авунвай к1валахрикай хьиз, Раида Алибеговади, гьак1ни сессиядал рахай хуьруьн поселенидин Собранидин депутатар тир Нариман Алибегова, поселенидин Собранидин ЖКХ-дин комиссиядин председатель Мурад Шерифова, поселенидин агъсакъалрин Советдин председатель Али Алиева, Качалхуьруьн миск1индин имам Ферзилагь Агъабегова, Ичинрин миск1индин имам Ариф Рустамова «Цмур» КДЦ-дин диретор Мусинат Нуралиевади, поселенидин агъсакъалрин Советдин член Суьлгьуьжат Алисултановади хуьрер аваданламишунин, агьалийрин яшайишдин хъсанарунин рекьерай 2014-2015-йисара тухуз плендик кутунвай к1валахрикай, гьялиз тахьанвай месэлайрикайни гегьеншдиз лагьана.
«сельсовет Цмурский» хуьруьн поселениди 2013-йисуз тухвай к1валахдиз сессиядал рази жедай къимет гана.
Хуьруьн поселенидин депутатрин Собранидал муниципальный райондин администрациядин кьилин заместитель Савин Велиев рахана. Ада районда социальный, экономикадин, культурадин, образованидин ва маса хилера тухузвай к1валахрикай, уьмуьрдиз кечирмишзавай программайрикайни проектрикай гегьеншгдиз суьгьбетна, «сельсовет Цмурский» хуьруьн поселенидин тухузвай к1валахдилай, санлай къачурла, муниципальный райондин Кьил Абдулмуталибов Нариман Шамсудинович рази тирдакай лагьана, поселенида к1валахар мадни хъсанардай, рехъ гузвай кимивилер арадай акъуддай меслятар къалурна.
Хазран Кьасумов
Шикилда: сессия кьиле физвай вахт.
Шикил автординди я.
